Lafaek News–Partidu Demokrátiku (PD), liu hosi nia orgaun Konsellu Superior iha reuniaun loron 6 no loron 7 fulan Janeiro simu disponibilidade kandidatu nain rua ne’ebé prontu atu kompete malu iha partidu liu husi konvensaun nasionál ne’ebé sei realiza iha loron 15 funlan Janeiro hodi sai nudar kandidatu nasionál.
Iha komunikadu imprensa ne’ebé lafaek news asesu iha loron 10/01/2022, husi media ofisial partidu Demokrátiku nian sita katak, Prezidente Repúblika iha loron 6 fulan Janeiru hahú ona konsultasaun ho partidus polítikus hotu hodi rona opiniaun molok atu deside loron eleisaun ba Presidente Repúblika ba periodu tinan 2022-2027.
Timor-Leste sei komemora tinan rua nulu (20) restaurasaun independénsia iha 20 de Maiu. Tinan rua nulu ita hamrik hanesan Nasaun hodi mos hala’o konstrusaun estadu liu hosi ezercisiu poder iha órgun soberanu sira. Prezidensia Repúblika, Parlamento Nasional, Governu no Tribunais sira,’’ komunikadu ne’e haktuir.
Hodi Komemora loron istóriku ne’e Timor-Leste, mos sei hatur nia Prezidente Repúblika foun ba periodu 2022-2027, hodi haburas no hametin demokrásia iha Timor-Leste maka Partido Demokrátiku ohin hakarak oficialmente anuncia Partisipasaun PD ho nia kandidatus preparadus atu konkore iha Eleisaun Prezidensial.
Kandidatu rua ne’e mak Deputado Parlamento Nasionál Bankada Demokrátiku, Mariano Assanami Sabino, (Prezidente Partidu Demokrátiku), deputadu Parlamentu Nasionál Bankada Partidu Demokrátiku, Adriano do Nascimento, (Prezidente Konsellu Polítiku Nasionál Partidu Demokrátiku.
Kandidatus Partidu Demokrátiku rua ne’e sei hala’o sira nia debate iha loron 15 fulan Janeiro atu aprezenta sira nia vizaun nu’udar Prezidente Repúblika ba partisipantes Konvensaun Nasional hodi hili demokratikamente, ida nudar Kandidatu Nasional atu kompete ho kandidatu seluk ba eleisoens presidensiais 2022-2027. (remata)
