Lafaek News—Parókia MariA Auxiliadora dos Cristãos Comoro, selebra misa agradesimentu ba solenidade Festa Saun João Bosco ba dala 136 ho tema “mehi ne’ebé mak halo ita mehi.
Iha omília, padre Agnelio Moreira SDB, hateten, Dom Bosco maka pessoa ne’ebé Maromak haraik mai Ita nudár Aman Mestre no Belun ba foins’ae sira no Dom Bosco hanesan mós Santu sira seluk ne’ebé Maromak bolu hodi tuir Nia.
Padre Agnelio Moreira, hanesan mós Presidente fundasaun Eskola Saleziana iha Timor-Leste, hateten Tinan ida né selebra mos tinan atus rua mehi Dom Bosco nian.
“Ita hanoin mós tinan 9 mehi ida ne’ebé fó influénsia boot ba nia hanoin tomak no ba nia Missaun, Mehi tinan 9 ida ne’e fó influénsia ba Dom Bosco nia mentalidade tomak, liuliu nia sentimentu kona-ba maromak nia prejensa iha ema ida-idak nia moris no iha mundu nia istória, ema hotu bele moris iha moris ne’ebé Santu, Ema hotu bele moris iha santidade, santidade ne’e ba ema hotu la’os ba Relijiozu sira de’it, ema hotu iha vokasaun sai santu, kada santu iha passadu, ema sala nain iha futuru rasik. Nia hatutan.
Padre ne’e relata, mensajen Amu Papa husu Familia Salésiana tenki sai ema konkretu hanesan Saun João Bosco, Saleziana ida ne’ebé di’ak hatene atu haree nia sorin sorin, haree situasaun no problema krítika sira hasoru realidade ne’e análiza no halo desizaun ne’ebé brani
Iha fatin Agata dos Santos nudar Juventude Saleziana haktuir mós nia Koñesimentu balun kona-ba Dom Bosco mak Aman, belun no modelo santidade nian no sai santu ida ne’ebé diak.
“Motivasaun ne’ebé hau hetan husi Dom Bosco mak haksolok iha moris loron loron, Halimar, Haksoit, Amigavel maibé hadook an husi sala katak wainhira ha’u hahu inklina an iha Grupo salésiano sira nian, habelun ho ema hotu no livre atu halo aktividade hotu iha vida relijiosa nian.
Observasaun lafaek news nota iha iha selebrasaun ne’e partisipa husi Padres no Seminaristas SDB, Madres no Irmâns FMA, Jovens salesianos, antigos alunos salesianos, grupos categoriais paróquia Comoro.
Jornalista : Andreda Costa
Editór : Agapito de Deus
