Lafaek News—Diretor Eskola Imaculada Conceição Munisípiu Ermera Pe, Patrocínio da Cunha Nunes esplika, hanesan estudante no jovem foin sae ida tenke koko atu  hakerek istória 30 de Agusto iha ida-idak nia neon atu nune’e labele haluha ba aban-bairua, manan independénsia, sorte inan-aman sira deside vota ba CNRT, se vota otonomi karik RDTL la eziste.

“Ita hotu hatene katak laiha 1515 la existe 1975 la iha 30 de Agusto 1999 sei la akontese 20 de Maio 2002, 30 de Agusto ohin loron komesa lakon ona nia sentidu ida kuida ema Timor oan sira nia neon, ita sira ne’ebe moris iha era ukun an nian ita la sente kona-ba saida mak ita nia maun, ita nia bin ita nia tian, ita nia avo, ita nia inan aman sira koko iha 30 de Agusto 1999  tinan 26 liu ba kotuk, iha momentu ida hanesan ne’e tinan 26 resin liu ba kotuk  mak ita nia maun, bin tiun avo sira iha situasaun ida ne’ebe difisil la’o iha ambiente traumátiku laran sira ba iha sentru votasaun nian hodi hatoo sira ninia votus hodi determina ba iha liberdade rai ida ne’e nian,” Diretor Jeral Koléjiu IMACON Ermera Pe. Patrocínio da Cunha Nunes ba Lafaek News, hafoin remata isar bandeira iha resintu eskola IMACON Ermera, sabadu 30/08/2025.

Nailulik ne’e esplika, tenke valorize inan-aman sira nia kotribuisaun, ema hotu luta, maibe desizaun iha inan-aman sira liman, Iha tempu ne’eba, inan aman sira nia aten brani ho domin, ohin loron ema hotu hetan libertasaun no hetan independénsia hodi bele hamriik mesak.

“Timor nia ukun an ida nee apenas hetan liberdade ho armas sira maibé ita nia inan-aman sira iha tempu neeba lori de’it pregu oan ida, maibé iha kabina ninia laran hili opsaun rua otonomia ou independénsia sei iha momentu neeba ita nia inan-aman sira mak hili iha otonomia ohin loron bandera RDTL ida ita dada sae ba iha lete nee sei la existe, tamba inan-aman sira nia aten brani tamba sira nia domin ikus mai sira fo duni sira nia an iha situasaun ida neebe difisil la’o iha armas no iha inimigu sira nia leet ho haraik-an fuan tuku-tuku lao ba iha sentru votasaun hodi deside Timor nia futuro, ne’ebe ohin loron sai hanesan prezente ida ba ita hotu-hotu hodi goja hanesan Timor oan ida ne’ebe independente ,Timor ida ne’ebe hamriik mesak,”  Nailulik esplika.

Direjente eskola Koléjiu MACON ne’e, hatoo lia-ikus katak, hanesan Timor oan koko oinsá tau respeita nafatin ba iha loron importante sira tamba ohin loron ne’e ema hotu goja ba iha ukun an, maibé atu too ba iha ukun an ida ne’e iha situasaun difisil lobuk ida mak familia sira luta, ukun-an sai hanesan prezente ida no ukun-an ida ne’e prezente ne’e la sai hanesan buat ne’ebe ema tau iha bandeza hodi mai oferta de’it, maibé liu husi sakrifisu lobuk ida mak to ohin loron bele hakerek letra haat hanaran (RDTL) Repúblika Demokratica Timor-Leste.

Jornalista : Jonaida Corte Real