Lafaek News—Komisaun Organizadora Jerasaun 12 Novembru 1991, husu deskulpa relasiona ho notisia ne’ebe Timor Post fo sai katak komisaun la prepara fatin ba media inklui failansu husi Master Ceremony rasik iha eventu istóriku komemorasaun loron nasional 12 de Novembru iha Santa Kruz ba dala 33 iha tinan 2024.
“Iha notisia ne’ebé fo sai iha Timor Post hori kalan katak parte komisaun la prepara fatin ba media sira iha ne’eba, kada tinan media nia fatin iha liman karu, maibé tanba hetan prezensa husi prezidente repúblika parte protokolu mak hili fatin entaun media ba fali liman loos ,se bainhira prezidente tuur media mak nafatin iha oin mos senti ladun di’ak, maibé ami haree fo sai notisia ba iha públiku dehan parte komisaun duni media tun sa’e iha Santa Krúz 12 de Novembru, ami parte komisaun rekoñse katak ami nia ero ne’ebe falha husi MC ami husu Deskulpa ba membru governu, membru parlamentu sira ne’ebé partisipa iha 12 de Novembru lori komisaun nia laran ami husu deskulpa ami fiar katak ba oin ami sei la halo tan,” Denilson Joly ba jornalista liu husi konferénsia imprensa iha CAMSTL, Kinta (14/11/2024).
Prezidente Komisaun Organizador 12 Novemrbu 20214, Denilson Joly dehan, Komemorasaun Masakre Santa Kruz ne’e hetan apoiu husi Ministeriu Juventude Desportu Arte no Kultura (MDJAK), Consellu Nasional da Juventude de Timor-Leste (CNJTL) no organizasaun sira seluk iha Timor Leste.
“Atividade sira ne’e ami hetan fiar husi (MJDAK) hanesan Jerasaun 12 de Novembru hetan fiar hodi toma konta ba komemorasaun 12 de Novembru ba dala-33 no mos CNJTL no mos oganizasaun sira seluk, ami parte komisaun hakarak fo sai ba públiku ba iha pontu tolu primeiru misa iha igreja Motael ita nia parte husi komisaun nota katak misa ne’e la’o ho diak no marsa husi igreja Motael ba iha Santa Kruz ne’e mos ami hare la’o ho di’ak, so faila de’it iha MC ne’e parte komisaun nota katak failha husi MC tanba MC la domina iha randaun,”nia afirma
Alende ida ne’e vice prezidente KO. Joao da Costa Freitas, apresia ba media ne’ebé konsege deskobre failansu husi komisaun organizadora atu ba oin bele organiza di’ak liután no Komisaun Organizadora J12 fo obrigadu ba Ministériu Juventude Desportu Arte no Kultura ne’ebé fo fiar tomak ba Jerasaun 12 de Novembru nian hodi organiza eventu istóriku ne’e.
“Apresia ba media ne’ebé fo sai ami iha falha apresia tebes atu nune’e bele hanorin ami para ami bele hare ami nian oh ida nee mak sala hau fiar katak ba oin sei diak liu tan no ita sempre estuda husi sala eventu boot ne sempre iha sala hanesan ohin kolega hateten kuaze husi joven hotu de’it iha sala duni no ami rekoñese ida ne’e obrigadu barak ba media no mos obrigadu barak ba (MJDAK) ne’ebé fo fiar ba grupu juventude sira,” nia esplika
Entretantu, Komemorasaun Nasional Masakre Santa Kruz ba dala 33, iha tinan ne’e hetan fundus husi Ministériu Juventude Desportu Arte no Kultura (MDJAK), total $ 202,700.00 no inklui selebrasaun loron Nasional Juventude ba dala 19 montante $30 mill.
Jornalista : Maria José/Ezequial
Editor : Agapito de Deus
