Lafaek News–Juventude uma lisan Lo’os no Siligatal munisípipu Bobonaro deklara fó apoiu kandidata independente Prezidente Repúblika, periodu 2022-2027 Isabel da Costa Ferreira iha eleisaun prezidensiál 2022 to’o 2027.
Portavoz Eurico França Santos hateten, razaun apoia kandidata Isabel da Costa Ferreira tanba nia kandidata ho independente no feto ne’ebé bele asegura unidade nasionál hodi lori hikas ba Timor oan tomak ho valór hanesan karidade, solidariedade, onestidade, tolerante, amante ba paz no entre seluk.
Ami husi Juventude Bobonaro manifesta ami nia apoia totál no inkondisionál ba Kandidata independente Dra. Isabel da Costa Ferreira ba eleisaun Prezidensiál ba periodu 2022 até 2027, ami hakarak la’o hamutuk ho Dra. Isabel da Costa Ferreira tanba nia hanesan Lider joven ida ne’ebé bele hahú atu loke odamatan mai Juventude sira hodi luta ba mudansa, ho valór karidade, solidariedade, onestidade, tolerante, amante ba paz no entre seluk, ” dehan Portavóz Eurico França Santos liuhusi konferénsia imprensa iha Helipot Bairo-Pite Dili, domingo (20/02/2022).
Nia akresenta, kandidata Isabel Ferreira nu’udar ativista ne’ebé sempre luta ba kestaun diretus humanus iha Timor-Leste no iha kapasidade morál atu ezerse funsaun ne’ebé mak nia kandidata ba.
Tempu ona atu ita eleze feto ba Prezidente Repúblika dalan ida oinsá bele promove igualidade jéneru iha Timor-Leste no ami nia konfisaun deposita tomak ba Doutora Isabel da Costa Ferreira hanesan Kandidatura independente iha festa demokrásia ida ne’e,” informa Portavoz Eurico.
Iha fatin hanesan mobiliadór apoiu konferénsia imprensa, Jacinto Baptista hateten, depois konferénsia ne’e remata sira ida-idak fila ba sira nia fatin hodi halo atividade dor to dor, maibé sei hein buletim votus tanba STAE seidauk ofisializa publiksaun ne’e.
Tanba ita labele fó ita nia Kandidatura ba risku ne’ebé hetan kondensaun husi mei balun, maibé hotu-hotu preparadu, depois de ida ne’e sei foti pontu vogais komesa halo ona atividade dor to dor,” hakotu Nia.
Jornalista : Juvita dos Santos
Editor : Agapito de Deus
