Lafaek News–Movimentu Juventude Eis Merkadu Komoro ne’ebe estabelese iha loron 12 Fulan Marsu-2022 iha munisípiu Dili, Postu Administrativu Dom Aleixo,Suco Fatuhada, deside apoiu kandidatu prezidente repúblika númeru sorteiru 14 Premiadu Nobel ba Paz, José Ramos Horta ba eleisaun prezidénsia periodu 2022-2027.
Movimentu ida ne’e hamri’ik bazeia ba inisiativa no vontade husi Juventude no Inan-Aman sira rasik no laiha tendensia obrigatoriu husi parte ruma, hare’e ba situasaun no asaun polítika husi makaer ukun sira, ne’ebe konsidera la fo valor ukun ida ne’e ba povu ho nasaun ho nune’e hafanun hikas esperitu juventude Eis Merkadu Komoro hodi hamri’ik luta hasoru hanoin at sira ne’ebe tenta invade vontade ho tátika polítika nakukun iha povu nia le’et.
Movimentu juventude eis merkadu Komoro afirma sira nia pozisaun hodi resposta ba deklarasaun husi konferensia imprensa ne’ebé realiza iha loron 03 Sábadu fulan Marsu liuba, maibé atu hatan katak juventude eis merkadu komoro hamriik ona iha filera Kay Rala Xanana Gusmão hodi apoiu kandidatu prezidente Repúblika periodu 2022-2027 Premiadu Nobel ba Paz José Ramos Horta.
‘Ami garante doutor José Ramos Horta manan iha primeira ronde,” katak portavoz ne’e.
Ho nune’e liu husi biban ida ne’e ohin ami Movimentu Juventude Eis Merkadu Komoro hakarak deklara ba publiku katak, ami Juventude Eis Merkadu Komoro firme no konsistensia iha ami nia desizaun rasik katak ami nafatin fo ami nia apoiu ba Partidu CNRT ne’ebe lideradu husi Maun Bo’ot KAY RALA XANANA GUSMAO, ami Juventude Eis Merkadu Komoro firme no konsisténsia hodi fo ami nia votus komfiansa ba kandidatu prezidente períodu 2022-2027,José Ramos Horta, iha premeiro ronde iha eleisaun ne’ebe sei realiza iha loron 19 Marsu 2022, ami Juventude Eis Merkadu Komoro firme no konsistensia sei halo esforsu tomak liu husi assaun door to door atu esplika ba eleitor tuan no eleitor foun hodi kontribui votus másimu ba grande kompanẽiru,José Ramos Horta,’’ afirma Portavoz Juventude Eis Merkadu Komoro Januario X. Sanches, ba jornalista sira liu husi konferénsia imprensa, sábadu (12/03/2022).
Portavoz juventude eis merkadu Komoro ne’e fundamenta, hakarak deklara iha fatin ida ne’e katak Merkadu Komoro ida de’it mak hamri’ik iha filheiras ida hodi fo votus komfiansa ba grande Kompañeiru José Ramos Horta iha eleisaun prezidénsia periodu 2022-2027.
Ami Juventude Eis Merkadu Komoro firme no sei halo vizilansia masimu hodi asegura tentasaun at ne’ebe mai ho misaun atu sobu votus partidu CNRT inklui votus ba Grande Kompañeiru Ramos Horta, Ami Juventude Eis Merkadu Komoro ho hakraik-an husu ba Inan-Aman inklui maluk juventude iha teritoriu Timor laran tomak mai hamutuk hodi fo vitoria ba Kandidatu Presidenti RDTL períodu 2022-2027 ba grande kompañeiru Ramos Horta,’’ Januario X. Sanches hakotu.
Jornalista : Abekha Raihusar
Editor : Agapito de Deus
