Lafaek News–(TIBAR)–Grupu Juventude Aileba-oan kompostu hosi Aldeia haat (4), Turuleu, Fatunia, Mau-Soi no Libulelo Suku Tibar, Postu Administrativu Bazertete, Munisipiu Likisá deklara prontu vota ba Kandidatu Prezidente Repúblika no númeru surteiu 14, José Ramos Horta ba períodu 2022-2027 ne’ebé hetan ona bensaun hosi lider Istóriku, Kay Rala Xanana Gusmão.
Ami Juventude Aileba-oan, kompostuhusi Aldeia 4 ne’ebé iha Suku Tibar, nu’udar grupu independente ida ne’ebé la inklina ba organizasaun no partidu politiku ruma, deklara hodi rai lulik Timor-Leste nia naran katak, ami prontu fó apoiu masimu ba Kandidatu Presidente Republika Premiadu Nobel da Paz Dr. José Ramos Horta ba Prezidente Republika ba periodu 2022 to 2027,”
Deklarasaun aberta ne’e afirma hosi Familia Boot Juventude Aileba-ona ne’ebé lee sai hosi Portavóz Juventude Aileba-Oan, Paulina Tanec da Silva Cono akompaña hosi Koordenadór Juventude Aileba-Oan Tibar, Plasidu Pereira iha Aldeia Turuleu, Suku Tibar, sabadu (19/02).
Grupu juventude sira ne’e konsidera Xanana no Ramos Horta maka bele hadia problema nasaun nian hodi hadia hikas ben estar povu no nasaun inklui dezenvolve no hadia ekonomia nasaun Timor-Leste, Juventude Aileba-oan sira mós obserba durante povu Timor-Leste sofre terus no hasoru dezastre oin-oin, Xanana no Ramos Horta maka tun direta hodi lori apoiu vítima sira iha Timor-Leste.
Ami fiar katak Dr. Jose Ramos Horta ne’ebé hetan ona apoiu maksimu hosi Lider Karizámatiku Kay Rala Xanana Gumão hamutuk ho Partido CNRT no partidu politiku sira seluk, inklui grupu apoiantes oi-oin iha duni kapasidade akumulativo hodi bele hakoak lider sira hotu, hahu hosi Lider jerasaun tuan, jerasaun foun, no lider kontinuador sira atu bele hakotu impase politiku iha rai laran,” nia hatete.
Juventude Aileba Oan fiar katak Premiadu Nobel da Paz José Ramos Horta iha pezu politiku atu bele rezolve problema interna liliu atu bele influensia Governi, nune’e bele hadia ekonomia povu no garantia estabilidade politika no seguransa iha rai laran .
Ami mós deposita ami nia konfiansa tomak ba José Ramos Horta ne’ebé koñesidu iha Mundu Internasionál atu bele promove no rekupera hikas imagen Timor Leste nin iha nivel regional no internasional ne’ebé foer ona durante tinan tolu (3) ikus ne’e. Ho rajaun hirak ne’e hotu, mak ami prontu servisu maka’as nune bele fo Vitoria ba Dr Jose Ramos Horta, atu lori ba Tur iha Palasiu Prezidente Nicolau Lobato Aitarak Laran hodi servi povo no Nasaun Timor-Leste,” nia hatete.
Ekipa juventude sira ne’e mós hahú servisu makas hodi sosializa informasaun ba povu sira iha Tibar esplika lista kandidatu prezidente José Ramos Horta no númeru surteiu 14 ne’ebé Tribunál Rekursu fó sai ona.(remata)
