Lafaek News—Governu Japaun liu hosi Xefe Diplomata iha Timor Leste, Yasushi Yamamoto, hateten governu Japaun prontu suporta ba povu Timor Leste liu hosi setor bee-mos no saúde inklui infra-estrutura no seluk tan.
Embaixador Japaun hato’o lia hirak ne’e hafoin Vizita Bee Timor-Leste, impreza Públika no Estasaun Tratamentu Bee (Water Treatment Plant-WTP) Central, Bairo-Pite, Dili kona-ba preparativu eventu loron 15-17 Janeiru 2026 nune’e membru Parlamentu Japaun nain 4 sei vizita Timor-Leste atu halo fiskalizasaun ba apoiu hirak hosi Governu Japaun iha Timor-Leste.
Hafoin vizitasaun estasaun tratamentu bee Sentral, Embaixadór Japaun iha Timor-Leste, Yasushi Yamamoto hateten, projetu bee moos ne’e susesu tebes, tan ne’e Japaun nafatin apoiu setor bee-mos iha Timor-Leste.
“Ha’u kontente tebes hare’e katak projetu ida ne’e susesu tebes ami koopera kleur ona no agora husi parte JICA, Nonaka San mak mai iha ne’e no fo hanoin ba projetu ida ne’e ami sei fo apoiu nafatin setor bee-mos ba povu Timor Leste tanba ne’e ami hein katak kontinua nafatin,”Embaixadór Japaun, Yasushi Yamamoto ba jornalista sira iha Laboratórium BTL Bairo-Pite, 13/01/2026.
Xefe Diplomata Japaun iha TL ne’e salienta katak setor bee-mos prioriedade atu suporta povu Timor Leste, maibé la’os area ida ne’e de’it, iha mos setor médiku sira no infraestrutura no seluk tan, tanba ne’eJapaun sei halo saida deit mak Timor Leste presiza atu ajuda tan.
“Governu Japaun apoiu bee no saneamentu ba Timor sai prioridade liu tamba bee mak importante ba ema nia saúde,” Yamamoto afirma.
Iha sorin seluk Presidente Komisaum Ezekutiva Bee Timor-Leste, Empresa Públika, Gustavo da Cruz hateten, Embaixador Japaun mai vizita BTL, ba iha eventu preparativu ida kona-ba iha loron 15-17 janeiru 2026, membru Parlamentu husi Japaun sei mai vizita Timor inklui mai BTL, IP liuliu ba estasaun tratamentu bee iha Sentral entaun Embaixador ohin ba vizita preparasaun iha estasaun Sentral Bairo-Pite.
“BTL nia preparativu mak servisu lao normal tamba durante ne’e BTL hetan apoiu ajistensia tékniku husi Governu Japaun liu husi JICA ne’ebé oras ne’e dadaun servisu hamutuk ho BTL, entaun hanesan sistema Administrasaun ka politika husi nasaun i ajénsia ne’ebé deit, depois sira nia apoiu, membru Ezekutivu sira ba vizita hodi halo auditoria, halo fiskalizasaun tamba sira nia apoiu tomak mai Timor-Leste ne’e aprova husi Parlamentu Japaun hodi finansia mai Timor, liu-liu bee no saneamentu,” Prezidente KE BTL afirma.
Estasaun tratamentu bee, hetan ajistensia tékniku Japaun liu husi JICA entaun obrigasaun liu husi membru Parlamentu Japaun nian mai vizita hodi halo fiskalizasaun, halo auditoria, rekolla informasaun ba apoiu sira ne’ebé Governu Japaun mai Timor-Leste liu-liu parte bee no saniamentu.
“Membru Parlamentu husi Japaun nain 4 mak sei mai iha loron 15-17 janeru 2026. Sira mai husi Partidu 3 ne’ebé asentu iha Nasaun Japaun nian maka hanesan: Deputadu Ishida Masahiro no Deputadu Adachi Masashi husi Partidu Demokratika Liberal; Deputada Koga Chikage husi Partidu Kontituisional Dekratika Jepan, Dekratika sosial no Indepedente no deputadu Ueda Kiyoshi husi Partidu Demokratika, Xefe delegasaun mak Deputadu Husi Partidu Demokratika Liberal, Masahiro,” Tenik Gustavo.
Nia salienta, Deputadu sira husi Japaun mai vizita ne’e mai liu BTL hodi hare’e no akompaña apoiu servisu sira ne’ebé Governu Japaun fo apoiu ona Timor-Leste liu-liu estasaun tratamentu bee Sentral. Governu Japaun servisu hamutuk ho Timor Leste hahu husi Restaurasaun Indepedensia hodi tulun povu sira, inisiu 2003 komesa apoiu konstrusaun estasaun tratamentu bee iha Bairo Pite, Benamauk, Dare, kontinua mellora iha Ainaro, Lospalos, Likisa ne’e hotu apoiu husi Japaun.
“Sistema distribuisaun transmisaun iha Dili apoiu husi Japaun ne’e gral hotu kedan. Entaun ita hetan ajistensia husi Governu Japaun, téknika asisten husi JICA ne’ebé apoiu ita, sira halo melloramentu bloku Zona iha Aileu kompostu husi aldeia tolu; Monte Mundu Perdido, aldeia Alemcari no Ramelau, no iha bloku Zona sira, Agora dadaun konsumidor husi Manleu asesu bee ho diak tamba ita nia koperasaun diak ho Governu Japaun, Apoiu asisténsia tékniku ne’e alende apoiu fiziku, apoiu BTL iha Soft treinamentu sira, entaun tinan 2 liu ba tékniku sira ba treinamentu iha Japaun, Kamboja, Thailandia, Indonesia no iha rai laran sira haruka sira Profisionalismu mai ajuda ita iha treinamentu liuliu treinamentu halo reparasaun manutensaun ita nia ekipamentu iha ita nia sesaun tratamentu bee nian ne’ebé mak fasilita duni ita nia tekniku sira hodi trata bee no saneamentu iha Timor,” Gustavo da Cruz hakotu.
Jornalista: Gracia Soares
