Lafaek News (Manatutu)-Kandidata Prezidente Repúblika periodu 2022-2027, Isabel da Costa Ferreira husu juventude atu prepara an sai ema kreativu hodi labele monu ba ema nia rikusoin no podér.
Joven sira, imi uza telemovel, imi asesu buat hotu, maibé imi mós tenke buka hatene sidadaun ida kreativu, sidadaun ne’ebé útil iha ha’u nia sosiedade para labele fasíl monu ba rikusoin no poder, kuandu mai lori ho oferta oan ida ba pozisaun oan ida ita hanoin ida ne’e mak di’ak hodi haluha tiha ita nia maluk sira seluk ne’ebé terus ho susar ita la preokupa,” dehan Isabel da Costa Ferreira iha nia kampaña daruak iha suku Lifau, postu Laleia munisípiu Manatutu, kinta (03/03/2022).
Enkuantu nasaun ida moris ho espiritu egoista, no materialista nasaun nunka ba oin tanba sidadaun laiha solidariedade ba malu, entaun kontinua ki’ak ki’ak ba bebeik, riku riku ba bebeik, ida ne’ebé boot boot ba bebeik.
Entaun ita lakoi situasaun ida ne’e kontinua iha Timor i la merese ho situasaun ida ne’e, tanba ema barak terus hodi liberta rai ida ne’e, ita ne’ebé moris tenke kontinua luta ba dezenvolvimentu rai ida ne’e,” informa Isabel Ferreira.
Observasaun Lafaek News nota iha mini kampaña ne’e hetan partisipasaun másimu husi juventude suku Lifau, postu Laleia, munisípiu Manatutu, autoridade lokál, ekipa Komisaun Nasionál Eleisaun (CNE) no kampaña la’o hakmatek tanba hetan apoiu seguransa husi Batallaun Ordem Públiku (BOP).
Jornalista : Juvita dos Santos
Editor : Agapito de Desu
