Lafaek News-(Likisá)-Kandidatu Prezidente Repúblika númeru sorteiu 1, José Ramos Horta iha nia diskursu polítika iha diálogu iha munisípiu Likisa afirma bainhira sae ba kargu prezidente repúblika sei la taka Grupu Arte Marsial (GAM), maibé presiza dezenvolve hodi kria estabilidade no lori Timor nia naran morin liután ba iha mundu.
Horta dehan, Grupu Arte Marsial (GAM) la’os konsentra malu hodi halo krime, arte marsial ne’e hanesan arte ida hodi dezenvolve mentalidade di’ak no kapasita liutan arte marsial atu bele kompete iha desportu internasional.
Ha’u sei la taka grupu arte marsial, maibé ha’u sei bolu lider arte marsial hotu servisu hamutuk ho polísia atu bele kontribui ba estabilidade paz iha sosiedade atu inan feton sira labele hakfodak,’’ katak José Ramos Horta iha mini-kampaña iha munisípiu Likisá, domingu (03/04/22).
Iha diálogu aberta ne’e, kandidatu José Ramos Horta hatoo agradesimentu boot ba povu Likisá tanba bele simu nia ho ekipa ho di’ak tebes, agradese liután Likisá bele fo votus barak iha primeira ronde, tanba ne’e fiar sei manan iha segunda ronde lori vitoria ba povu Timor Leste.
Obrigadu Likisa simu ami iha ne’e, ohin hau atu mai iha ne’e, jornalista ida telefone hau, ha’u dehan ba reuniaun ida, afinal hau mai reuniaun boot loos, liu fali ha’u alin nia reuniaun iha Ermera, hau atu la mai, maibe ha’u tenke mai duni tanba Likisa ha’u konese di’ak, Ha’u la ladun ko’alia barak, ema balun temi ha’u nia naran iha televizaun, katak nia uluk PM PR halo saida, uluk hau PM iha 2016 la duni sai ema ruma hau governu, hau nunka halo, ha’u la fahe kilat ba ema ida, ha’u laos fundador FALINTIL maibe ha’u fundador ASDT hamutuk ho Avo Xavier dezde tempu Portuges hau konese diak Nicolao Lobato, inklui Luis Guterres, nia sai uluk ami ba estuda iha Portugal,’’ Horta dehan.
aleinde ne’e, Horta mos husu koordenadores partidu hotu kompostu husi CNRT, PDRT, PD, PATIFOR, Frente-Mudansa, ASDT, PUDD ho PDC, PDN ho PST iha munisípiu Likisá domingu (03/04/22), atu servisu maka’as iha baze liu husi dor to dor hodi prepara ba eleisaun loron 19 fulan Abril.
Entretantu, Iha diálogu aberta ne’e lia nain Likisá fóder ho lian tokodede hodi simu kandidatu prezidente repúblika José Ramos Horta, no akompania husi sekretáriu jeral partidu CNRT Francisco Kalbuadi Lay, prezidente PD, Mariano Assanami Sabino Lopes ho sekretariu jeral Antonio da Conceição, Prezidente PATIFOR Grigorio Saldanha, Prezidente PDRT Agustino Gomes ho Anacleto Bento, sekretariu jeral Frente Mudanca, Ricardo Nheu, sekretariu jeral PUDD, Silvestre Selvi ho sekretariu jeral PDN Lucas Aiata, ho prezidente PST Avelino Coellho, nune’e serimonia ritual simu lider hirak ne’e remata tama kedan ho orasaun akompania ho knanuk hau Timor-oan maromak-oan ho inu nasionál Patria-Patria.
Observasaun Lafaek News nota eventu diálogu observa direta husi STAE, CNE no-mos observador nasional no internasional inklui militantes partidu polítikus hotu ne’ebé apoiu kandidatu José Ramos Horta, no atividade diálogu hetan seguransa másimu husi PNTL munisípiu Likisá.
Jornalista : Agapito de Deus
Editor : Floriano Soares
