Lafaek News–Premiadu Nobel da Paz, José Ramos Horta observa kondisaun infra-estrutura kompostu estrada, eletrisidade, saúde no edukasaun iha postu administrativu Ossu munisípiu Vikeke.
kandidatu Prezidente periodu 2022-2027, José Ramos Horta triste bainhira haree kondisaun estrada iha komunidade aldeia Wailia suku Uabubu infrenta iha tempu udan inklui eletrisidade ne’ebé mak seidauk tama iha suku refere.
Ohin ha’u mai iha ne’e hare rasik kondisaun estrada ne’ebé mak aat no eletrisidade ne’ebé mak seidauk tama iha fatin ne’e komunidade lubuk ida iha fatin ida ne’e riku tebes produtu lokal, maibé sira la lori ba merkadu vikeke tanba sira nia estrada at loos,’’ dehan eis prezidente repúblika daruak ne’e hafoin diálogu ho militante CNRT no PST iha aldeia Wailia suku Uabubu postu Administrativu Ossu Munisípiu Vikeke, sábadu (05/02/2022).
iha vizita ne’e veteranus aldeia Wailia, José da Silva alias Radikiu agradese ba Kandidatu Prezidente Repúblika, José Ramos Horta ne’ebé marka prezensa iha Suku Wailia postu administrativu Ossu hodi observa direita kondisaun estrada, eletrisidade, saúde no edukasaun iha postu refere.
Ha’u agradese ba líder nasionál hanesan José Ramos Horta bele mai vizita ami nia Suku ne’ebe izoladu tebes, hodi haree rasik ho matan ami nia kondisaun estrada no eletrisidade iha area ida ne’e,’ dehan veteranu Radikiu.
Iha okaziaun ne’e Radikiu husu kandidatu Prezidente José Ramos Horta bainhira sai Xefe Estadu keta haluha mós povu suku Wailia postu Administrativu Ossu munisípiu Vikeke nia halerik.
Partesipante ne’ebé mak marka prezensa iha diálogu ne’e Eis Presidente Partidu Sosial Demokrátiku, Joao Concalves, Presidente Partidu Socialista Timor (PST) Avelino Coelho inklui Estrutura Partidu CNRT Munisípiu Vikeke too Postu administrativu Ossu.
Jornalista : Abeka Rai-Husar
Editor : Agapito de Deus
