Lafaek News—Familia kbiit laek Sebastião Elu ho nia kaben no oan nain-6, moris nakonu ho halerik iha sikun sidade iluzaun ne’ebe furak iha oin, maibe kotuk hakiak mata-wen, lian la too, tan laiha hela fatin ida be diak hanesan sira seluk hodi abrigu an husi udan no anin boot.

Maske moris hanesan ema kb’it la’ek, maibe nafatin luta hodi hakbi’it moris ne’e liu hosi maneira saida de’it, naran katak hisik kosar been rasik. Ida ne’e mak hala’o husi kbi’it la’ek Sebastião Elu, husi Aldeia Sanane Suku Costa Postu Administrativu Pante Makasar Regiaun Autonomo Enclave Oe-cuse.

Sebastião Elu, ba daudaun ne’e hela de’it iha baraka oan ida hamutuk ho nia oan na’in ne’en kompostu mane ha’at feto rua, ne’ebe daudaun ne’e mos sente triste tebes tanba to’o agora governu seidauk tau matan.

Nun e’e,  uma ne’ebe mak oras ne’e daudaun Kbi’it La’ek ne’e hamahan an ba risku tebes tanba atu besik monu no uma kakuluk mos kuak hotu ona, tanba ne’e husu ba governu sebele karik tau netik atensaun.

Maske nune’e, Kbi’it la’ek ne’e fiar katak, ho governu da sia ne’ebe lidera husi Primeru Ministru (PM) Kay Rala Xanana Gusmão ne’e bele tau atensaun ba sira liu husi programa uma naroman. Tanba povu kbi’it la’ek barak mak to’o oras ne’e sei hein hein hela.

“Ha’u husu ba Governu da sia ida ne’e atu bele tau matan Hela Mai Ami povu Ki’ik Sira iha karaik. iha Governu da Ualu kria ona programa uma naroman ba povu maibe ha’u la hetan, tamba ne’e hau husu ba Governu da sia ne’e nafatin tau prioridade atu nune’e povu kbi’it la’ek sira ne’ebe seidauk hetan bele hetan hotu,” rekomenda Sebastião Elu, bainhira dadalia ho Lafaek News iha Aldeia Sanane.

Sebastião Elu mos durante ne’e sente ladun di’ak ho orsamentu ne’ebe aloka ba RAEOA, tanba hanesan povu ki’ik so rona de’it oasan nia naran, maibe ukun na’in sira mak goza. 

Nia hein katak, governu da sia ne’e bele tau atensaun ba kestaun orsamentu ne’ebe aloka  ba RAEOA ne’e Povu RAEOA mos bele hetan hotu tanba osan ne’e osan povu nia.  

Atividade ne’ebe hala’o husi Sebastião Elu mak hanesan lor-loron tenke ba ke bee posu iha ninia vizinu sira ne’ebe presija nia ajuda, husi ne’e Sebatião Elu bele hetan netik osan hodi sustente ninia uma laran liu-liu trata nia oan sira ba eskola tanba ne’e susar tebes atu halo uma di’ak.   

“Lor-loron ha’u ba ke Vizinu sira nia be posu hodi bele hetan osan atu bele uza hodi responde ba nesesidade uma laran nian, balun uza hodi hola oan sira nia matérial eskola, tanba oan na’in ha’at mak SMA ona, tamba ne’e ha’u laiha kbi’it atu halo tan uma husi be

“Posu ne’e ha’u ke dalaruma ema fo de’it $25 dolar balun hanoin fo to’o $30 dolar   husi osan hirak ne’e lato’o atu halo uma di’ak tamba hare ba oan sira nia eskola,  nia haktuir.

Nune’e, Xefe Aldeia Sanane Francisco Ais mos rekoñese katak, husi  ninia parte nia povu barak mak kbi’it la’ek. No husi nia parte iha tempu ne’eba so povu kbi’it la’ek uma kain tolu de’it mak hetan ona ajuda ba programa uma naroman ka Uma ba Kbi’it La’ek (UKL).

“Ita kulia Kona ba kbi’it laek La’os Sebastião Elu de’it mas barak lo’os, maibé Sebastião Elu merese atu hetan duni uma naroman iha tempu tuir mai,” rekoñese Xefe Aldeia ne’e.

Tanba ne’e, Autoridade lokál ne’e mos nafatin husu ba governu da sia ne’ebé lidera husi Primeiru Ministru Kay Rala Xanana Gusmão, atu tau konsiderasaun nune’e povu kbi’it la’ek sira ne’ebé seidauk hetan uma naroman bele hetan hotu no husu atu labele hapara programa ne’e.

Tuir observasaun Jornalista Lafaek News iha Oe-cusse nota katak, kondisaun uma husi Kbi’it La’ek Sebastião Elu Grave tebes.

Jornalista : Mateus Felisberto de Deus

Editór       : Marcos da Silva Araujo