Lafaek News—Governu liu husi Konsellu Ministru (KM) sei aplika kuarentena ba sidadaun sira ne’ebé mai husi nasaun afetadu variante-Delta bainhira tama iha Timor-Leste (TL), maske simu ona vasina kompletu (dalarua).
Ministru Prezidénsia Konsellu Ministru (MPKM) hateten, sé mak simu vasinasaun kompleta no mai ka liu husi país sira ne’ebé identifika ona variante Delta SARS-CoV-2, tenke kumpre kuarentena loron lima. Sé mak la simu vasinasaun kompleta kontinua kumpre kuarentena loron 14.Tanba kompara ho medida sira ezekusaun anteriór deklarasaun estadu emerjénsia, halo ona alterasaun sira hodi redús risku importasaun husi variante Delta SARS-CoV-2 iha Timor-Leste.
“Governu determina ona katak ema hotu-hotu ne’ebé hakarak tama iha Timor-Leste tenke aprezenta komprovativu husi rezultadu negativu husi teste detesaun SARS-CoV-2 ka COVID-19, ho antiguidade la liu loron 5”, dehan MPKM Fidelis Magalhães hafoin remata enkontru KM iha Palasio Governu Dili, Kinta semana ne’e.
Governante ne’e akresenta, hafoin halo análize ba aprezentasaun kona-ba pontu situasaun epidemiolójika país nian, husi koordenadór sira husi Sala Situasaun Sentru Integradu Jestaun Krize (SIJK), Konsellu Ministrus aprova ona projetu Dekretu Governu nian kona-ba medida sira ezekusaun Deklarasaun Estadu Emerjénsia, ne’ebé efetua husi Dekretu Prezidente Repúblika n. 39/2021, loron 30 fulan-juñu hodi hatán ba pandemia COVID-19.
“Estadu emerjénsia, ne’ebé renova daudaun ne’e, abranje ba territóriu nasionál tomak no vigora husi tuku 00:00 loron 2 fulan-jullu tinan 2021 to’o tuku 23:59 loron 31 fulan-jullu tinan 2021”, hakotu Fidelis Magalhães.
Jornalista : Juvita dos Santos
Editór : Agapito de Deus
