Lafaek News—Prezidente Autoridade Munisipiu Dili (PAMD), Gregório Saldanha afirma, Governu iha ona plano atu halo Monumentu no muda rate sira iha Santa Krus 12 de Novembro ne’ebé okupa dalan.
“Rate ne’e ita hotu hatene uluk akontese istória iha governu investe ona osan atu halo monumentu ba oin iha asuntu lubuk ida mak tenke rezolve ida maka estatua deside hotu ona desizaun halo hotu ona hotu-hotu konkorda, primeiru halo diskusaun ikus balun konkorda balun la konkorda pois ikus konkorda hotu ona, ida maka atu loke dalan uluk luan hela maibe depois tempu ida naruk ba beik beik dalan sira ne’e nakonu ho rate ona” dehan PAM, Gregorio Saldanha iha Semiteriu Santa Kruz 12 de Novembru, Sabadu, 16/11/2024
Gregório reafirma, governu iha obrigasaun hodi kordena ho família nia vonatde hodi hamamuk no hasai rate sira ne’ebé okupa iha dalan.
“Entaun Estadu iha obrigasaun atu fo hatene família atu kordena família hein família ninia hakarak ninia vontade atu hamamuk fatin sira ne’e Hau kuandu ba ona munisipiu Dili hanesan Presidente hau konvida família sira lubuk ida ba maioria konkorda entaun prosesu tuir mai tenke hasai ona rate sira ne’e tanba tempu ne’e ba bei-beik,” Gregorio hateten
Rate ne’ebé hasai primeira faze iha 50 resin husi kapela kotuk to’o iha Saudozu Sebastião Gomes nia rate no fase tuir husi kapela to iha Krús boot ba portaun tasi nian.
“Primeira fase ne’e ami rate besik lima nulu (50) resin identifika hotu ona husi kapela kotu ba to iha Saudozu Sebastião rate lubuk ida iha ne’eba depois fase seluk fali mai maka dalan husi kapela ne’e ba to iha Kruz bot ne’e mos rate tolu hat iha ne’eba tenke hasai, dalan parte lateral husi tasi ninian dalan odamtan Kiik ne’e ba to iha rohan Lorosae nian, depois dalan husi parte leten foho ninian odamatan Kiik nian ba to iha rohan ne’eba hotu para Aban Bain Rua ne’e Fatin ne’e bele sai ona Jardim hanesan muzeum ita ba mai mos livre” haktuir Presidente PAM
Entretantu, Rate sira ne’ebé parte governu hasai sei tau iha fatin hanesan Ossuáriu ne’ebé prepara ona iha fatin iha Semitériu Santa Krús 12 de Novembru nian, Alende ne’e mos parte Governu sei tau regulamentu ba oráriu ne’ebe hakoi mate isin hodi labele enkomoda fatin sira iha Santa Krúz.
Jornalista : Aniceto Dias
Editor. : Agapito de Deus
