Lafaek news-Governu liuhusi Sekretáriu Estadu Formasaun Profisionál no Empregu (SEFOPE) Sesta 29/09/2023, Iha ne’ebé nafatin halo despedida ba joven na’in 84 hodi ba servisu iha Austrália.
Tuir Sekretáriu Estadu Formasaun Profisionál no Empregu interinu (SEFOPE) Mateus do Santos Tallo hatete katak, bazeia ba polítika lX-governu nian sei esforsu maka’as iha asuntu dezemvolvimentu ekonomía nian liu-liu ba numeru joven ho idade produtivu ne’ebe mak bo’ot no oportunidade ba servisu mos sei menus tanba ne’e liu husi SEFOPE iha oportunidade hodi haruka joven sira ba servisu iha rai li’ur.
“IX Governu sei esforsu maka’as ba asuntu dezemvolvimentu ekonomía nian, ita hotu hatene katak númeru joven ho idade produtivu ne’ebé mak bo’ot oportunidade ba servisu mos menus entaun oinsá liu husi SEFOPE iha ona oportunidade hodi ba servisu iha Rai liur,” Tallo dehan.
Nia hatutan tan, Liu husi oportunidade hirak ne’e IX governu mos sei esforsu maka’as para oinsá buka nafatin nasaun Amigos sira para bele simu nafatin joven sira hodi ba servisu iha rai liur.
Nia haktuir, Oportunidade ba servisu iha rai li’ur liur la’ós hanesan temporariu maibé sei hadia hodi investor mos ba sira nia kapasidade tanba ne’e ba oin governo liuhusi SEFOPE sei tau atensaun ba asuntu semi Skill no high skills.
“Ba oin governu sei tau atensaun liu-liu SEFOPE atu hare’e ba asuntu semi skills no high skill Sira ne’ebé bele hetan oportunidade di’akliu aliende hetan osan, hetan oportunidade servisu ida mos ba aprende iha indústria, ida ne’e mak importante ba ita nia nasaun,” katak nia.
Iha sorin seluk traballadór Luis de Jesus Tilman aumenta tan katak, Liuhusi oportunidade ne’ebé mak SEFOPE fasilita ne’e bele hanorin no eduka atu bele hetan esperiénsia foun husi nasaun seluk, nune’e fila mai bele kontribui ba desemvolvimentu iha rai deben ida ne’e.
“Uluk na na’in ha’u agradese ba SEFOPE tanba oportunidade ne’ebé mak sira fó bele hanorin no eduka ami nomós ami bele hetan esperiénsia foun husi Austrália bainhira ami fila mai bele fahe fali esperiénsia ne’ebé mak ami hetan hodi fahe fali ba kolega sira seluk,” tenik Luis.
Nia parte enkoraja ba joven sira atu hakribi violénsia hodi buka tuir nafatin formasaun sira nune’e bele hetan oportunidade hodi ba servisu iha rai li’ur hodi nune’e bele ajuda inan aman nomós responde nesesidade uma laran.
Entretantu husi traballadór 84 ne’e sei aranka ba Austrália hahú husi loron Segunda ba oin traballadór hirak ne’e maioria servisu iha área horti kultura, tanba ne’e bazeia ba tékniku traballadór hirak ne’e ba servisu ho kontratu Fulan 9 bele mos to’o tinan 3.
Jornalista : Felix Fernandes
Editor : Paulo Collo
