Lafaek News—Governu liu husi reuniaun Konsellu Ministru ohin, (28/07) hala’o sorumutuk deside impoin Serka Sanitária iha Munisípiu Ermera no Dili kontinua mantein to’o loron 12 fulan agusto 2021.
Ministru Prezidénsia no Konsellu Ministru (MPKM) Fidelis Manuel Magalhães hateten, Konsellu Ministrus delibera mós projetu Rezolusaun Governu nian rua hodi mantein impozisaun serka sanitária iha munisípiu Dili to’o oras 23:59 husi loron 12 fulan-agostu tinan 2021 no impoin mós serka sanitária iha munisípiu Ermera entre oras 00:00 husi loron 29 fulan-jullu tinan 2021 to’o oras 23:59 loron 12 fulan-agostu tinan 2021.
“Impoin Serka Sanitária iha Munisípiu Ermera tanba konsellu ministru simu imformasaun katak númeru infesaun derepente de’it sae makas ba 122,” dehan MPKM Fidelis Manuel Magalhães ba Jornalista hafoin remata enkontru KM iha Palasio Governu Dili, kuarta (28/07/21).
Governante ne’e akresenta, iha serka sanitária ne’e bandu sirkulasaun ema sira-nian entre munisípiu Dili no Ermera no sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian, la inklui iha proibisaun sirkulasaun ida-ne’e indivídu sira ne’ebé komprova vasinasaun kompleta (doze rua) kontra COVID-19, no mós ba labarik sira ho idade tinan 6 mai kraik ne’ebé akompaña.
Jornalista : Juvita dos Santos
Asisten Editór : Pedro de Almeida
