Lafaek News--Diretór Ezekutivu Forum Organizasaun Noun-Governamental Timor Leste (FONGTIL), Daniel Santos do Carmo hateten, hanesan observadór haree situasaun reál análiza ho proposta husi governu signifikadu extende estadu emerjénsia ho razaun antisipa variante Delta ne’ebé iha ona Timor Leste.
“Entaun ita antesipa tanba ita iha esperénsia ba Covid-19 ninia orijen ne’e tama ita nia rai tanba laos ema sira pasajen legál ne’e maibé, ema sira ne’ebé pasajen ilegál nemak derepente ita rona katak Suai no Dili iha,’’ Daniel ba Jornalista hafoin remata enkontru ho Prezidente da Repúblika iha Palasiu Prezidente Nicolau Lobato Bairu-Pite Dili, segunda (26/07/21).
Nia akresenta, esperiénsia ne’ebé iha ho hanoin katak tenke rigorozu, tanba agora iha problema boot ida, governu deside reativa eskola depois maioria ema sira ne’ebé ba eskola la’os ema vasina.
“Tenke rigorozu tanba da-daun ne’e ita iha Problema ida, governu deside reativa eskola, depois ema sira ne’ebé vasina ne’e ita define husi idade 18 to’o 60, maibé agora ita reativa eskola ema sira ne’ebé ba eskola laos ema sira ne’ebé vasina tanba maioria sira ne’ebé ho idade 18 ba kraik to’o 0 anos ne’e sira mak agora iha eskola, agora variate Delta ne’e tuir informasaun siénsia nian katak nia perigu ba alin sira ne’ebé kiik oan”. Informa Nia.
Daniel mos fo hanoin katak, la podia Ministériu Edukasaun tenke ansi reativa eskola iha Dili mak tenke kuidadu maibé iha Munisipiu sira seluk eskola lao normál, ne’eduni iha Dili governu iha planu atu hola Pfizer hodi vasina kiik oan sira entaun podia aselera uluk ida ne’e.
Jornalista : Juvita dos Santos
Editór : Agapito de Deus
