Lafaek News—Diretora Fokupers, Domingas Afonso Amaral afirma relasiona ho kazu asediu seksual ne’ebé akontese iha Universidade Nasional Timor Lorosa’e (UNTL), too ohin loron Fokupers seidauk simu keixa maibé FOKUPERS-Rede Feto, JSMP no ALFela kontinua rejiste ho kompremisiu hodi enkoraza no apoiu fo asistensia liu hosi deklarasaun liu hosi media atu nune’e vitíma labele sente mesak.
Diretora FOKUPERS hatoo asuntu ne’e liu hosi konferénsia imprensa iha Farol Dili (08/10/2025), liga ho kazu asediu seksual ne’ebé deskonfia involve direta hosi dosente balun iha UNTL Fakuldade Siensia Sosial, Departamentu Polítika Públiku ho inisial BM.
“Vitíma sira la mai keixa direta iha Fokupers, maibé nu’udar organizasaun ida ne’ebé fó asisténsia ba feto no labarik no feto vitíma, ami asiste ona iha media, organizasaun nia komprimisiu mak halo presta estatementu ida liu husi media hodi suporta maluk vitíma sira no karik seluk sei iha bele enkoraza hodi bele kontinua brani fo sai no ko’alia sai violénsia saida mak sira hasoru,” Diretóra Fokupers, Domingas Afonso Amaral ba jornalista sira iha Fokupers Farol Dili.
Nia relata iha tinan kotuk Fokupers ho UNTL asina ona memorandu ida hodi hare’e ba asegura kampus seguru ho inisiativa asegura prevensaun asédiu seksuál, violénsia bazeia ba jéneru no mos atu reforsa mekanizmu referal iha kampus refere, no Fokupers, Rede-Feto hamutuk ho JSMP inklui organizasaun sira seluk hamrik nafatin hodi korajen no fo apoiu asisténsia legal, no apoiu psikolojia ba kliente vitíma sira, wainhira presiza, karik sira la brani mai keixa mos ami nafatin hato’o estatmentu liu husi media hodi enkoraja no akompaña vitíma sira atu labele sente mesak.
Iha fatin hanesan Koordenadora JSMP, Flora Soriana Menezes haktuir, kazu asédiu seksual hirak ne’e iha ona prosesu, ema hotu hatene katak iha Konstituisaun no Funsaun Públiku mos iha lei sansaun ba autór sira, entaun JSMP, Fokupers, Rede-Feto no organizasaun relevante sira hein, karik vitíma sira presiza organizasaun sira fo apoiu no prontu hamrik iha sira nia sorin.
“Vitíma sira mai, ami bele asegura no fo apoiu asisténsia legal atu sira lori ba oin, husi prosesu mak ita hare’e ne’e krime entaun sei liu husi investigasaun maka foin to’o ba tribunal,”Coordenadora JSMP ne’e subliña.
Maske vitíma sira la rejistu iha Fokupers ,maibé organizasaun hamriik hodi fo apoiu no halo presta estatmentu no deklarasaun sira hodi hato’o ba instituisaun relevante atu nune’e toma konsiderasaun ejistensia ne’ebé mak Rede-Feto, Fokupers no JSMP fo sai.
Jornalista: Gracia Soares
