Lafaek News—Arsebispu Metropolitanu Dili, Cardeal Dom Virgílio do Carmo da Silva, SDB, fo hanoin ba sarani sira katak sentidu lolos hosi Natal atu haksolok ba maromak, la’os ksolok an no halibur-an de’it ba buat mundu nian, ohin loron sentidu natal lakon iha mundu komérsial nia laran.
Cardeal ne’e husu sarani sira hotu iha Timor-Leste atu deskobre fali sentidu loloos husi Natal, ne’ebé dala barak lakon tiha iha mundu komersiál nia laran, Maromak nudar prinsípiu dame nian liu husi kosok-oan ida ne’ebé mai atu kura ita ema husi laran.
“Maromak, nu’udar prínsipiu damen nian, tama iha istória umanidade nian la’ós atu konkista ho “espada no kora”, maibé liuhosi Kosok-oan kbiit-laek ida iha sidade ne’ebé ema la koñese, liafuan Maromak nian ne’ebé halo-an ba ema no hola isin ita ema nian atu kura ita husi laran,”Arse Bispu Metrolitana Dili Cardeal Virgílio do Carmo da Silva ba jornalista sira iha Lecidere, Tersa 23/12/2025.
Maromak hili pobreza duké kbiit, no hili prosimidade (besik) duké distánsia, mundu ohin loron dekoradu ho aihun natal no naroman oi-oin, mensajen lolos husi prezépiu mak ksolok ne’ebé kontra ho mundu komersiál, Ksolok lolos la’ós iha halibur sasan ba an rasik, maibé iha kbiit atu fahe-an ba Maromak no ba ema seluk, natal akontese ohin loron iha eukaristia iha ema kiak sira, iha família, no iha sakrifísiu loron-loron nian.
Lider mos husu sarani sira atu adora Kosok-oan Jesus liu-hosi hahalok no konkretu no perdua malu
“Hasoru mundu ida ne’ebé nakonu ho ódiu, funu, no indiferensia, sarani sira atu adora Kosok-oan Jesus liu-hosi hahalok konkretu, perdua malu haka’as-an atu perdua hirak ne’ebé hakanek ita-nia fuan, sSolidariedade sai belun ba sira ne’ebé sente mesak no abandonadu, hahalok haraik-an, halakon arogánsia no ambisaun ne’ebé fahe malu,” Arse Bispu ne’e fo hanoin.
Sarani sira mos presiza atu hafoun sira-nia vokasaun atu sai “Cristu ida saseluk” no sai naroman ba fatin sira ne’ebé nakukun iha tinan foun 2026.
Jornalista : Moises Guterres
Editor : Agapito dedeus
