Lafaek News — Ministru Prezidénsia no Konsellu Ministru (MPKM), Fidelis Manuel Leite Magalhães informa, atividade ne’ebé Primeiru Ministru halo ba iha munisípiu ne’e nuudar nia dever ida no reponsabilidade Primeiru Ministru nian hodi ko’alia ho komunidade sira atu rona sira nia preokupasaun, maibé la’os atu buka votus.
“Bankada opozisaun halo duni nia knaar hanesan opozisaun nee mak krítika nee, nee diak, bankada CNRT koalia no levanta kona-ba ida nee, maibé naun kerdizer ke buat neebé sira koalia nee loos, sira kolia tanba iha direitu, dever konstituisional ida para koalia, neebé hanesan opozisaun dalaruma buat loos mós ita dehan sala hotu, mais klaru katak PM halo nee halo hanesan Xefe Governu, Xefe do Governu nee importante tebes ba nia atu ba munisípiu sira hasoru direta komunidade sira ho autoridade lokál sira rona rasik husi sira, preokupasaun sira, dezafiu sira neebé mak sira hasoru loro-loron, susar sira neebé sira enfrenta loro-loron,” dehan MPKM Fidelis hafoin remata enkontru KM iha Palasio Governo Dili, kuarta (12/01/2022).
Ne’e duni PM hanesan ema ne’ebé kaer bolante governasaun nian, bele orienta Ministériu sira bele hola medidas sira hodi responde ba populasaun nia preokupasaun.
“Se PM ba mós sira krítika, PM la ba mós sira krítika, kuandu la ba dehan katak PM nusá mak sai Primeiru Ministru tuur iha Dili deit la ba munisípiu, agora PM ba tiha ona munisípiu nusá ba munisípiu la tuur iha Dili neebé buat hotu neebé PM halo nee politika iha demokrasia ida hanesan nee, buat neebé PM halo nee opozisaun sempre dehan ladiak deit, neebé husik ba ita nia sidadaun sira, ita nia povu sira mak haree rasik no julga rasik ba, tanba ami mós ba fati-fatin ami simu komunikasaun iha nee, ita nia komunidade barak mak husu dehan atu PM bele hakat mai hamutuk ho ami, rona diretamente ami nia lian,” hakotu MPKM Fidelis.
Jornalista : Juvita dos Santos
Editor : Agapito de Deus
