Lafaek News—Udan boot iha loron 30 fulan Janeiru 2023, udan been hatodan ailele hun boot ida lahuk hela besik faluk Palmira Guterres nia uma foun ne’ebé foin harii nia kotuk tohar hanehan uma isin lolon tomak aat liu kedan.
Ho salvasaun na’i-maromak iha tempu ne’eba, ailele huun boot ne’e tohar iha tuku 11 dadeer, bainhira faluk ho nia oan nia beiaon mane oan ida (tinan 6) iha hela toos laran, hakfodak rona tarutu halai husi toos laran mai haree ai tahan ho sanak tomak nabutuk hela iha uma leten ho kalen belit latan an iha blok leten, matan haree de’it husi besik labele halo buat ida, faluk rasik ho laran maus katak la’os ema ida mak tesi ai ne’e hodi hanehan tiha nia uma at hanesan ne’e.
“Ita atu hirus see loos, tanba la’os ema ruma mak tesi, ai ne’e mak tohar rasik, agradese ba maromak tanba la hanehan ami iha uma laran, agradese ba nai maromak ai ne’e tohar loos iha rai loron,” katak faluk Palmira iha nia rezidénsia suku Hera postu administrativu Metinaro munisípiu Dili, foin lalais.
Bainhira dezastre natureza ne’e liu tiha loron ida xefe povoasaun ho ekipa bombeiros ne’ebé halo protesaun ba populasaun too kedan iha faluk Palmira nia uma hodi lori mákina tesi kedan ai ne’e husi uma leten, maibé ekipa hirak ne’e labele hiit sai ai pedasuk boot hirak ne’ebé koa kota ona, tanba ailele ne’e hun boot sukat karik ema nain haat mak bele hakoak haleu, nune’e ema hirak ne’e sente hiit ai rohan rohan ne’ebé koa kotu ona labele tanba todan, no too agora ai hirak ne’e sei latan hela iha uma laran.
Faluk Palmira Guterres hela iha Hera area Rotunda ba liman karuk diresaun tasi ibun Dolok-Oan Kristu Rei nian, hela dezde tempu Indonézia too Timor haketak an husi Soeharto nia rejimentu, faluk ne’e la konsege ona hanoin hikas tempu barak ne’ebé liu ona, hela nafatin too ohin loron.
Inan faluk ne’e ho nia esforsu rasik halo negósiu kiik hanesan fan modo hodi selu oan mane dahuluk eskola, no hetan servisu hodi harii uma ne’e, maibé seidauk hela ai-tohar hanehan estrags total, maske la hanehan ema ho animal ruma, maibé laran tanis hela, maibé liafuan kroat la hasai tanba planu natureza nian.
Bainhira dada lia ikus ho faluk Palmira, hateten dezastre ne’e akontese parte autoridade lokál rejista ona no entrega kedas ba Ministériu Solidariedade Sosiál no Inkluzaun munisípiu Dili hodi apoiu emerjénsia.
Jornalista : Aniceto Dias
Editor : Agapito de Deus
