Lafaek News—Prezidente Asosiasaun Feto Hamutuk ba Dezenvolvementu Covalima (AFEHDC), Fátima Amaral Freitas enkoraza Feto Timor tomak atu hamutuk suporta malu hodi Kontra violénsia hasoru feto ne’ebé akontese iha Timor no husu Parlamentu Nasional kria Lei Pena Perpetua ba ema ne’ebé hasai ema seluk nia vida.
Fatima hatete Lia hirak ne relasiona ho vitima Palomita ne’ebé Lakon Nia Vida tanba hetan oho hosi autor irresponsabilidade.
“Ami hosi asosiasaun hato’o ami nia sentidu kondolénsia profundu ba familia enlutada, ami sente triste no ami lamenta ho aktu ne’ebé autor halo ba vítima hodi halakon nia vida” Prezidente Fatima Lamenta, iha Matai, Sesta (20/11).
Tuir nia aktu sira hanesan ne akontese bebeik ona, maibe la hetan atensaun sériu hosi organ kompetente sira.
“Se kazu sira hanesan ne akontese bebeik ona, tanba saida agora ita sei nonok, ita feto labele nonok ita tenke revolta,” Nia enkoraza.
Bazeia ba realidade hirak ne’e, nia husu ba Parlamentu Nasional liu husi komisaun A, atu halo alterasaun ba lei omesídiu, katak ba autor ne’ebé kompete iha krime halakon ema nia vida ou oho ema tenke hetan Pena perpetua.
Aliende ne’e nia mo’s husu ba Grupu Mulheres Parlamentar Timor-Leste (GMPTL) tenke tau Matan ho sériu ba kestaun sira hanesan ne’e tanba GMPTL assume papel importante ba asuntu feto.
Antes hakotu, nia husu ba feto Timor tomak, tenke brani no ajuda feto maluk ne’ebé husu ajuda.
“Ita la bele husik leet de’it ita nia feto maluk ne’ebé husu ajuda ba ita,” Nia hakotu. ( Venidora Oliveira)


