Lafaek News—Tinan tolu nia laran, faluk Maria Doutél Sarmento moris mesak iha mahon ida be horik ho hamlaha, udan-ben turuk no aihan la too, fiar iha maromak mehi tatulak ba bandeira nakonu ho esperansa ne’ebé rohan sai fohuk no mihis too mout de’it.
Lian Hosi povu kiik nia ibun fo sai, esperansa kala mout leet, se uluk la hola parte iha funu, halai-laran monu too liman tohar, ohin loron kaer servisu la di’ak, hanoin atu ezije sai veterana, se lerek hatutan lian ne’e ba ulun funu nain sira be ukun ohin loron, prega metin esperansa ba bandeira mean ba taka hela iha hadak toba ulun nian.
“Veteranus mos ha’u la hetan tamba ha’u forsa laiha atu husu ha’u nia direitu,”Maria Doutél Sarmento, haktuir ba Lafaek News iha aldeia Fahi-Lebu Berenama, postu Turiscai Manufahi, 01/11/2026.
Faluk Maria nia hela fatin lokalizada iha laletek Berenama, hosi vila Turiscai la’o ain kuaze oras rua, dook hosi merkadu no sentru saúde, ho kondisaun liman ne’ebé defsiénsia, loro-loron kee toos kuda aihan local hanesan fehuk, talas no aifarina hodi hatutan moris.
Susar liu ba sira nain rua ninia moris, iha tempu udan, udan been turuk borus hosi uma kauluk habokon faluk nia toba fatin ne’ebé taka netik didin leet ho lona ho kór laranja, hafutar ho bandeira FRETILIN iha nia hadak ulun nudar memoria luta nian nafatin metin iha faluk nia fuan.
Iha hadak-leten ne’e, nahe de’it ho biti modern tahan rua, nahe tatulak ba lona leten hodi hafalun an hosi malirin no udan been turukk hosi kakuluk no didin leet, sumasu tahan ulun falun ida no manta tahan ida hodi falun isin nudar abrigu tahan malirin iha tinan tolu nia laran.
“Ita ema nia forsa mak liman, ema hotu iha forsa tanba ema nia liman di’ak, bele ka’er toos ba haan, ha’u forsa laiha tanba ha’u nia liman, 1975 halai funu ha’u monu mak ha’u nia liman tohar tiha hanesan ne’e, maibé too agora osan veteranus mos ha’u la hetan, tan ha’u forsa laiha atu husu ha’u nia direitu,” lia halerik hosi inan faluk Maria ba Lafaek News iha laletek Beremana Turiscai.
Inan faluk Maria mos haktuir asesu osan idoza maibé la sufisiente atu hadia nia uma inklui sustenta sira nain rua nia moris, demora liutan osan idozus nian asesu trimestrál, dala ruma tenke ba empresta ema nia osan hodi sosa hahán ruma hodi selu ho osan idoza.
Vicente Gudinho nudár família, ne’ebé besik liu ho inan faluk ne’e, katak durante ne’e inan faluk Maria nia kaben husik hela nia mesak, fila ba aman maromak nia kadunan santo iha 2023, inan faluk Maria Doutél Sarmento garantia ba osan idoza, tanba ho nia kondisaun difisiénsia liman, maibé fulan tolu mak foin simu osan ne’e hodi sustenta moris, maibé susar atu hadia nia uma tanba osan la sufisiente.
“Ha’u sempre tau matan ba ami nia inan ne’e, maibé ha’u mos kbi’it la to’o, ha’u kbi’it mak ha’u ajuda kee toos atu nune’e bele garantia ba nesidade loro˗loron to tempo kafé ku’u ha’u bele ku’u kafé hodi hatan ba ami nesesidade loron˗loron,” Vicente haktuir.
Situsaun seluk ne’ebé viziñu akompania lor-loron iha moris faluk Maria ho nia oan mane ne’ebé sofre mos mental, sira nain-rua terus liu iha tempu udan, tanba uma ne’ebé sira horik ba kondisaun la di’ak ona, didin sira fohuk no leet ona, kalen feruzen no udan tiru borus hosi liur tama uma laran, halo sira susar liutan sira nia moris.
Hatan bai nan faluk Maria ninia sofrementu moris ne’e, Orlando Soares nudar Xefe Suku Beremana, hatun lia katak, hanesan Xefe Suku, durante nia Mandatu ba dala tolu ona, suku Beremana submete ona dadus faluk Maria Sarmento Doutél, ba ona Ministériu Solidariedade Sosiál, maibé too agora seidauk iha resposta, MSSI maki ha kompeténsia atu buka solusaun, lideransa lokál nia servisu mak submeter ona relatóriu.
“Durante ha’u nia mandatu ba dala tolu ne’e dadus ne’ebé mak ami kobre iha suku Beremana aldeia tolu mak hanesan, aldeia Beremana, aldeia Fahi Lebu no aldeia Dalubo, aldeia tolu ne’e dadus iha hotu ona no balu ami hatama ona ba Parte MSSI Munisipio, maibé parte relevante mak seidauk iha vontade hodi haree asuntu ne’e, la’os iha suku Beremana de’it, maibé suku 10 ne’ebé iha postu Turiscai ne’e hanesan hotu, dadus ba maluk vunerável sira iha ona MSSI.
Nudár autoridade lokál kontinua halo servisu atu komunidade vunerável liu-liu hanesan faluk Maria Sarmento Doutél, atu bele hetan nia direitu, liu-liu uma dignu atu inan faluk ne’e bele moris iha uma dignu.
“Ami nia Esperansa mak ami nia komunidade vunerável sira tenki hetan sira nia direitu, ami kontinua foti dadus hatama ba MSSI, maibé la hatene too banhira mak parte relavante tau prioridade ba asunto ida ne’e, vunerável kuaze iha suku 10 resin asesu uma dignu liu-liu tau matan hosi Ministériu Solidariedade Sosial no inkluzaun, maske dadus submeter ona.
Nune’e, liga preukupasaun inan faluk Maria Doutéll Sarmento nian, hanesan xefe suku sei esforsu nafatin hodi buka solusaun, liu-liu kontinua hatoo pedidu ba Ministériu Solidariedade Sosiál no Inkluzaun MSSI atu bele buka solusaun bai nan faluk Maria Doutél Sarmento.
Tuir dadus ne’ebé Lafaek News asesu hosi Xefe Suku katak total kbiit laek iha aldeia Fahi-Lebu suku Beremana nian hamutuk 20 no uma kain 2 mak asesu ona uma dignu, iha mos Ema ho Defisiénsia nain 5, no total uma kain hamutuk 60.
Jornalista : Agapito de Deus
