Lafaek News—Ministru Komsériu no Indústria, Uniaun Europeia no Internasional Trade Center(ICT-sigla ingles) hala’o workshop diskusaun relasiona ho akordu Dijital Economy Framework agreement iha Timor Leste, ne’ebé sei asina loron 12 fulan Novembru 2026.
“Ohin, organiza workshop ida ne’ebé envolve Ministériu Komérsiu no Indústria, Uniaun Europeia no International Trade Centre (ITC). Workshop ne’e realiza atu diskute prosesu no preparasaun hotu-hotu ne’ebé relasiona ho akordu Digital Economy Framework Agreement no sei asina iha loron 12 fulan Novembru tinan ida-ne’e,”MCI Nino Pereira ba jornalista Sira iha Otél-Timor, tersa 13/10/2026/.
Situasaun merkadu global, liu-liu iha rejiaun Ázia, Timor-Leste presiza adapta-an no avansa hamutuk ho dezenvolvimentu teknolojia, tan ne’e presiza digitaliza aspetu hotu-hotu iha atividade ekonómika.
“Ita tenke haree no avalia progresu ne’ebé ministériu sira halo ona, atu hatene situasaun no dezafiu ne’ebé ita hasoru iha prosesu transformasaun dijitál. Ida-ne’e inklui sistema alfándega, sistema pagamentu, sistema jurídiku no oinsá ita bele liga sistema sira-ne’e entre nasaun sira iha Ázia.
Tanba sistema dijitál ne’ebé di’ak bele fasilita atividade esportasaun no importasaun, no mos movimentu ekonomiku, liuliu ba mikro, ki’ik no média empresa sira. Sistema pagamentu online ne’ebé seguru bele ajuda emprezáriu sira atu halo tranzasaun ekonómika ho fásil, lalais no fiável.
Alein de ne’e, ligasaun entre sistema dijitál nasaun sira bele hametin kooperasaun, aumenta konfiansa no fasilita komérsiu iha rejiaun Ázia.
Governante ne’e akresenta Timor-Leste presiza dezenvolve polítika no sistema ekonomia dijitál ne’ebé forte atu dezenvolve plataforma Dijital iha Timor Leste ho di’ak, ministériu hotu-hotu tenke iha responsabilidade atu servisu hamutuk, dezenvolve plataforma dijitál no hadi’a asesu ba informasaun, kréditu no servisu dijitál sira no Governu mos presiza fó atensaun ba investimentu, koordenasaun entre instituisaun sira no hadi’a sistema pagamentu, atu fasilita atividade ekonomika iha Timor-Leste.
Iha fatin hanesan Embaixador Unaiao Europeia iha Timor Leste Thorsten Bargfrede hateten, presiza fó apoiu ba setór privadu atu bele dezenvolve no aumenta sira-nia kapasidade liuhosi sistema dijitál.
“Enkontru ne’e foka ba asuntu sira ne’ebé relasiona ho dezenvolvimentu sistema dijitál no nia kontribuisaun ba ekonomia. Sistema dijitál bele sai instrumentu importante atu apoia setór privadu, liuliu iha área komérsiu, liuhosi utilizasaun plataforma dijitál.
Organizasaun Internasionál ne’ebé servisu iha área komérsiu, inklui Sentru Komérsiu no Indústria no organizasaun sira ne’ebé integra iha sistema Nasoins Unidas (ONU), bele fó apoiu ba Governu Timor-Leste iha prosesu integrasaun ekonomia dijitál.
Tamba apoiu ne’e importante atu Timor-Leste, bele integra ho di’ak liu iha sistema ekonomia dijitál no hetan asesu ba oportunidade dezenvolvimentu internasionál, sistema rejistrasaun dijitál sai elementu importante ida atu fasilita prosesu integrasaun no hadi’a asesu ba servisu dijitál. Projetu sira ne’e bele ajuda aumenta investimentu iha setór públiku no setór privadu, liuliu iha área ekonomia dijitál.
Parlamentu no instituisaun relevante sira presiza asegura katak sistema dijitál ne’e integra ho polítika nasionál no iha mekanizmu ne’ebé bele garante konfiansa públiku, ho sistema pagamentu online ne’ebé seguru no fasil atu uza, ema bele sosa no fa’an produtu liuhosi internet no halo pagamentu eletróniku. Ida-ne’e bele fasilita atividade komersiál no kria oportunid kria oportunidade foun ba negósiu sira iha Timor-Leste.
Jornalista : Moises Guterres
