Lafaek News Covalima—Milena Pires partilla esperiénsia kona-ba partisipasaun feto iha implementasaun polítika podér lokál no desentralizasaun administrativa ba membru Asosiasaun Feto Hamutuk ba Dezenvolvimentu Covalima (AFEHDC), iha Postu Administrativu Maucatar, munisípiu Covalima.
Milena Pires, ne’ebé nu’udar Figura Feto Potensial Timor-Leste, esplika katak implementasaun desentralizasaun administrativa sei hakbesik governu ho komunidade, liuliu iha área infraestrutura, prestasaun servisu públiku, dezenvolvimentu agrikultura no área sira seluk.
“Buat ne’ebé estadu sei la desentraliza mak polítika ne’ebé ita bele dehan soberania Estadu, ho nia funsaun balun, hanesan defeza. Polítika Estadu sei la desentraliza ba munisípiu sira, munisípiu sira iha podér atu deside kona-ba dezenvolvimentu”, Milena Pires hato’o asuntu ne’e iha Suku Matai, Postu Administrativu Maucatar, 15/09/2026.
Nia hateten katak oportunidade ba feto sira atu partisipa iha prosesu desentralizasaun administrativa bele liu husi Planu Dezenvolvimentu Munisípiu (PDM), ne’ebé sai nu’udar instrumentu importante ba munisípiu atu define prioridade dezenvolvimentu.
Tanba ne’e, nia konsidera importante ba feto sira, liuliu membru asosiasaun, atu komprende sira nia papel no partisipa ativamente iha prosesu elaborasaun planu dezenvolvimentu.
“Ha’u enkoraja asosiasaun sira atu defini didiak saida mak imi hanoin no prioridade ba dezenvolvimentu iha Munisípiu Covalima, liuliu iha Postu Administrativu Maucatar. Imi haree imi nia moris loroloron, saida mak falta no saida mak presiza halo. Hanoin hamutuk ida-ne’e bele sai planu ba dezenvolvimentu feto iha Covalima”, nia dehan.
Milena mós husu ba feto sira atu tau hanoin hamutuk ho feto sira husi postu administrativu seluk, tanba prioridade no nesesidade feto sira iha postu administrativu ida-idak bele diferente.
Nia mós alerta ba membru AFEHDC atu servisu hamutuk no lolo liman ba malu iha prosesu elaborasaun planu, nune’e feto sira bele sai forsa ida iha dezenvolvimentu munisípiu.
“Labele de’it elabora planu ida, tenke haree saida mak ita halo ona, saida mak seidauk halo, saida mak sei kontinua no saida mak presiza hadi’a liután durante mandatu tinan haat. área importante sira tenke sai prioridade iha planu,” nia sujere.
Bazeia ba avaliasaun kona-ba situasaun iha Covalima, Milena konsidera katak sei iha aspetu balun ne’ebé presiza hadi’a, inklui estrutura no kritériu sira ne’ebé presiza prepara molok munisípiu simu responsabilidade liután iha prosesu desentralizasaun administrativa.
“Ha’u fiar feto bele asumi kargu hanesan Prezidente Autoridade Munisípiu Covalima, tanba feto sira bele hatene problema saida mak iha Covalima no saida mak presiza halo, inklui iha suku sira”, nia dehan. Iha fatin hanesan prezidente AFEHDC, Fatima Amaral, sente kontente tanba sira nia asosiasaun ne bele hetan vizita hosi Feto potensial Timor-Leste. “Ami hosi asosiasaun sente kontente tanba hosi surumutu ne Ami bele aumenta Ami Nia kunesementu no hetan buat foun hosi sra Milena,” Nia apresia.
Iha parte seluk, Administradór Postu Administrativu Maucatar, Laurentino de Jesus, apresia prezensa Milena Pires nu’udar Figura Feto Potensial Timor-Leste ne’ebé partilla esperiénsia kona-ba implementasaun desentralizasaun administrativa.
“Ha’u, hanesan autoridade postu, apoia no enkoraja feto potensial sira atu bele hasoru implementasaun desentralizasaun administrativa. Maibé, ita presiza sosializa informasaun to’o iha baze no presiza mós identifika feto potensial sira”, nia enkoraja.
Enkuantu Espoza hosi Xefe Suku Matai, Madalena Maia, sente honra boot tanba hetan vizita ida ne. “Sente kontente, tanba mana Milena bele oferese tempu hosi Mai vizita asosiasaun feto iha Suku Matai,” Nia hakotu.
Jornalista : Venidora Oliveira
