Lafaek News—Komunidade aldeia Riatoni suku Hapu Postu administrativu Letefoho, munisípiu Ermera, kestiona maka’as kompania CCECC ne’ebé konstroi Estrada Letefoho Vila liga ba suku Dukurai, lamenta tebes kompania internasional (CCECC) la satan netik bee hodi sulin tama too komunidade sira nia uma laran iha tempu udan tau maka’as.
Inan faluk Judit de Jesus idade (60) nudar abitante aldeia Riatoni suku Haupu, lamenta katak iha tempu udan bee sulin tuun hosi Mauleu-hata (simiteiru) nian tuu hotu ba area Rema-Lalan, Ripusun no Risuan aldeia Riatoni, no iha parte Rema-Lalan mak sai vítima liu tanba bee sulin hanesan mota tun hosi Estrada area Mauleu-Hata hodi fo impaktu ba avo faluk Judit nia hela fatin (rema-lalan) inklui komunidade sira iha area Ripusun ho Risuan.
“Bee sulin tuun mai hanesan mota, ha’u atu halo hanusa, ha’u ema ferik faluk, bainhira udan boot ne’e bee sulin tun mai hanesan mota, tama too uma laran, ami la’o sai ba liur mos la di’ak,” faluk Judit inform aba Lafaek News, iha nia rezidensia Remala-Lalan aldeia Riatoni, 15/01/2026.
Ina faluk ne’e husu autoridade local entre suku Dukurai no Haupu atu fo hanoin ba kompania ne’ebe responsabiliza Estrada ne’e tenke hadia uluk valeta nune’e iha tempu udan labee prejudika fali komunidade sira nia hela fatin inklui komunidade sira nia plantasaun.
Iha sorin seluk, komunidade Riatoni, Paulo Soares mos kestiona kompania ne’ebe halo Estrada iha suku Dukurai ne’e tenke responsabiliza hadia lalais barajen bee nian atu labele lori sofre ba povu kiik ne’ebe hela besik Estrada area Mauleu-Hata nian.
“Ha’u husu ba kompania ne’e tenke hadia lalais valeta atu bee labele sulin fali tuun mai ami nia uma, bainhira iha tempu udan boot ne’e ami area Rema-Lalan ne’e mak sofre no sai vítima loos ba bee ne’ebe sulin hosi Mauleu-Hata rate nian tuun hotu mai ami nia uma,” dehan Paulo Soares ba Lafaek News foin lalais iha nia rezidénsia aldeia Riatoni.
Paulo mos rekomenda ba parte Autoridade liu-liu Xefe Aldeia Riatoni atu fo hanoin ba autoridade parte suku Dukarai nian hodi fo hanoin ba kompania refere (CCECC) atu normaliza lalais valeta parte Maulei-Hata nian atu labele fo impaktu ba povu kiik sira iha area refere.
Observasaun joralista Lafaek News iha terrenu nota katak bee sulin maka’as hanesan mota enkuantu udan tau maka’as, no bee kadalak hosi estrada area simiteiru Mauleu-Hata nian, sulin ho volume boot tuun ba area Rema-Lalan aldeia Riatoni, no fo impaktu ba komunidade sira liu-liu sofre liu ba inan faluk Judit de Jesus nia hela fatin.
Ekipa Kobertura : Lafaek News
