Lafaek News—Uniaun Estudante Universitariu Munisipiu Ermera UNEUMER la aseita ho politika Guvernu nian atu Sosa kareta parado unidade 65 ba depudu, tanba Timor Leste sei kiak iha porsentu 48,2/
Portavoz Sergio Ximenes da Costa hatete Uniaun Estudante Universitariu Munisipiu Ermera lamenta te’ebes ho polítika parlamentu nasional sesta legislatura ne’ebe aprova proposta orsamentu sosa kareta prado 65 ba deputadu.
“Polítika PN ne’ebe aprova proposta orsamentu pribativu ba tinan fiskál 2025 ho total miliaun 4.2 ba sosa kareta foun ho marka prado unidade 65 ba membru PN sesta lejislatura nian, UNEUMER lamenta tebes ho polítika sesta lejislatura PN nian ne’ebe aprova proposta orsamentu privativu ba sosa kareta prado,” Sergio Ximenes da Costa ba jornalista sira iha Jardin 2 de Maio Dili, iha loron Kinta 11/09/2025.
UNEUMER konsidera-se deputadu sira iha Parlamentu Nasional halo traisaun ba prinsipiu bem-estar social ka moris di’ak povu nian, dadus konkretu ne’ebe UNEUMER asesu Timor Leste moris iha liña pobreza 48,2%, falta ba edukasaun laiha kualidade, falta asessu fasilidade saúde no be’e mos, 2023 taxa inseguransa aihan 27% husi populasaun (ema 360,000 mil), 2024 mal nutrisaun krónika ba labarik 47%, no 2024 taxa dezempregu 1,60% konektividade estrada rural no urbanu balun sei kontinua sai problema sériu ne’ebé difikulta movimentu transporte públiku no privadu iha nivel teritóriu tomak partikularmente munisipiu Ermera.
Deputadu sira moris previléjiu no regalias oi-oin hanesan, simu laptop, simu prado, subsídiu ba kombustivel, subsídiu ba alojamentu ka hela fatin, subsidiu ba tratamentu saúde, subsídiu ba apoio serbisu polítika, subsídiu ba mate nian, no mós salário mensal ho montante bo’ot.
UNEUMER konsidera-se deputadu sira iha Parlamentu Nasional halo traisaun ba prinsipiu bem-estar social ka moris diak povu nian, la halo fsikalizasaun no la buka dados sira, tuir kondisaun real iha Timor-Leste, tur de’it iha fatin depois, proposta orsamentu sosa kareta, la haree ba povu nia susar no terus iha nasaun RDTL”
Iha fatin hanesan Prezidente Uniaun Estudante Universitáriu Munisípiu Ermera (UNEUMER) Jaqeu Maia de Araujo, konsidera deputadu sira iha parlamentu nasional ne’e isin lolon mak sei moris, maibé vizaun mate tiha ona.
“Deputadu sira ohin loron produz lei atu benifisia sira no lei sira ne’e hotu la benifisia ba povu atu hanehan povu, povu ida ohin loron terus, povu ida ne’e maa estrada la diak, povu Ida mal nutrisaun povu ida ne’ebe hela fatin mos la diak i sira nafatin deside ba sira nia moris sira la’os ona alternativu ba ita,” dehan Prezidente UNEUMER ne’e.
Jornalista Trifónio M. de Araujo/Moises Guterres.
