Lafaek News—Instituto Nasional Kombate HIV-SIDA, kuarta (09/07/2025) realiza atividade sensibilizasaun ba komunidade suku Comoro atu Evita an hosi HIV-SIDA.
Diretora Nasional Promoasaun Prevensaun no Komunikasaun HIV-SIDA, Angelina da Costa Soares, afirma sosailizasaun ne’e ba liu komunidade jerál atu hasa’e koñesimentu komunidade sira nian oinsá bele hadook-an hosi da’et moras refere.
“Sosializasaun ne’e foka liu ba komunidade jeral atu hasa’e koñesimentu komunidade no labarik sira atu nune’e sira bele hatene voluntariamente hatene katak durante ne’e sira moris iha risku nia laran sira bele hakbesik aan ba fasilidade saúde atu nune’e bele tratamentu ba sira nia saúde hodi teste hodi sira bele hatene sira nia estatus kona duni HIV SIDA,” Angelaina da Costa Soares ba jornalista sira iha suku Comoro hafoin remata sensibilizasaun virus HIV-SIDA.
Diretora ne’e husu komunidade sira no foin sae sira aproveita tempu ne’e hodi fokus ba eskola atu atinje liu hosi estudu hodi hetan future ne’ebé nabilan.
Iha fatin hanesan Xefe suku Comoro, Eligio da silva Marçal, haktuir sensibilizasaun ne’e importante ba komunidade atu bele prevene-an sedu husi virus ne’e.
“Hanesan autoridade senti importante tebes ba Ita nia komunidade sira, tanba ita rona ona katak dala-barak HIV-SIDA afeita liu ba ita nia komunidade sira ita nia populasaun Timor uituan de’it foin mak rihun 1.3 agora Ita iha problema virus HIV-SIDA hamutuk 2000 ne’e konta iha Timor ne’e boot ita presiza halo sensibilizasaun ba komunidade sira bainhira ekipa ida ne’e mai, ha’u senti orguilho tebes ba ami atu halo kooperasaun ba aldeia 14 ne’e aprovita ho oportudades ida ne’e ami hakarak husi parte saúde bele ko’alia barak liutan atu komunidade sira bele pasa informasaun hirak ne’e ba komunidade sira ne’ebe la mai partisipa,” Xefe suku Comoro ne’e sublina.
Lideransa komunitaria ne’e mos rekomenda ba joven sira tenki hatene-aan rasik hases-an husi sexu-livre ne’e no idade boot mak forma familia diak liu, tanba forma familia ho idade kiik estraga ita nia vida iha futuru.
Jornalista : Moises Guterres/Ana da Silva
