Lafaek News—Programa Monitorizasaun Sistema Judisial (JSMP), realiza aniversáriu ba dala 24 no lansa relatoriu JSMP nia monitorizasaun tolu kona-ba observasaun Jeral iha setór Justisa 2023, Parlamentu Nasional 2023, no relatóriu institusional 2023.
Prezidente Board JSMP, Aniceto Neves Berteni, relata JSMP nia servisu foka liu ba setór justisia, durante observasaun jeral JSMP identifika progresu servisu iha setór Justisa inklui obstakulu hirak ne’ebé JSMP infrenta.
“Tinan 24, Timor-Leste rejista servisu lubuk bo’ot ida iha setór justisa no susesu ne’e tenke sai fini atu enkoraja ita liu-liu iha setór Justisa atu servisu makaas liután hodi hadia obstaklu sira ne’ebé ita infrenta da-daun ne’e”, Prezidente Board JSMP, Aniceto Neves Berteni, iha salaun Delta Nova, Segunda 28/04/2025.
Aniceto reafirma, SMP hakarak kontribui liu-liu iha setór justisa, JSMP mos lakohi lakon tempu atu kontribui fo hanoin parte relevante sira kona-ba obstaklu hirak ne’ebé JSMP infrenta, tanba obstaklu ida ne’e la’os entidade setór justisa nia servisu de’it, maibé konta mos sosiedade sira nia servisu tanba papel mak diferente, maibé servisu misaun ida de’it mak atu habelar no hametin Justisia iha Timor-Leste.
“Ami nia monitorizasaun ne’e foka ba setór importante rua, ida mak Violênsia Bazeia ba Jeneru ho Violênsia Hasoru Labarik, JSMP ninia monitorizasaun ne’e la’o iha tribunal Dili, Baucau, Suai no Oe-Cusse iha relatóriu JSMP deskobre durante tinan ida nia laran bele sai nu’udar referensia ba autor Justisa no autór sira iha governu atu halo planu dezenvolvimentu no planu polítika ruma bele konsidera mos JSMP nia relatóriu sai referensia ida mak atu kualifika servisu setór justisa iha future,” tenik nia.
Iha Fatin hanesan Ministru Justisa Sérgio da Costa Hornai, fundamenta ho papel JSMP importante tebes no mos parseiru internasional no nasional sira ne’ebé iha fileira JSMP nian atu fo apoiu asisténsia sira iha JSMP husi inísiu estebelese ezistensia JSMP ohin sira selebra JSMP nia aniversáriu ba tinan 24.
Governante ne’e subliña, Nonu Governu mai ho nia vizaun ema hotu mos, mai ho nia vizaun bo’ot iha planu estratéjia dezenvolvimentu nasional 2021, 2011 no 2030, nu’udar giaun bo’ot ida.
“Ita hotu buka esforsu atu halo integrasaun iha ita nia Programa nasional ba iha dezenvolvimentu iha ita nia giaun ou ita nia matadalan iha planu estratéjia ida atu ita labele haree de’it direitu, ita buka hatun fila fali mai hodi hato’o iha ita nia Programa ou planu estratéjia iha setór justisia nian, iha 2011 no 2030 atu buka hatene lolos Timor-Leste nia restaurasaun depois la’o ninia dezenvolvimentu institusional to’o ona iha ne’ebé,” nia sublina.
Jornalista : Moises Guterres
