Lafaek News—Sekretaria Estadu Komunikasaun Sosial (SEKOMS), segunda (28/04/2025) asina nota entendimentu (NE) ho Child Fund Timor Leste, ho objetivu promove internet saudável no literasia mediátika ba joven no estudante sira.
“Servisu hamutuk oinsa bele hala’o literasia mediátika nian ba joven sira, estudante sira no escola ne’ebe identifika ona iha Dili no-mos escola sira iha Lospalos, ita hotu hatene katak ho avansu teknolojia ida ne’e ema hotu uza espasu dijitál ba iha nia interese privadu inklui komunidade ho familia presiza, bainhira uza ne’e bele komprende di’ak liután oinsá uza internet ho saudavel, lolos ne’e ho avansa teknolojia ne’e lori vantajen ba ita atu komprende di’ak, ba estudante sira uza hodi bele hetan materia escola nian, hanesan Google no YouTube, maibe balun uza espasu dijital ba hanesan sitiu, sitiu sira ne’ebe la appropriadu ba, sosiadade no familia, tan ne’e mak servisu hamutuk ne’e benefisiu prinsipál atu uza espasu dijital sira,” SEKOMS Expedito Dias Ximenes ba Jornalista sira hafoin remata asina memorandum entendimentu iha sala renuaun SEKOMS, segunda /28/04/2025.
Tanba ne’e, governante ne’e husu ba sosiedade liu-liu estudante no foin sa’e sira atu uza internet ho responsabilidade, buka atu aprende hosi espasu dijital, la’os uza espasu dijital ne’ebé la apropriadu no la ho responsabilidade.
Iha fatin hanesan Diretór Chilf Fund Timor Leste, Alzira Sequeira Freitas do Reis, reforsa katak Child Fund asina nota entendimentu ne’e ho intensaun atu promove liután espasu dijital nune’e bele uza bele era dijital ne’e seguru liu-liu estudante no joven sira bele aproveita dijitalizasaun ne’e ho didi’ak.
“Ami atu promove liután dijitál literasia ne’ebe iha hodi uza plataforma sira iha dijitál ninian ba iha promove internet seguru no mos aspeitu sira ne’ebe hotu ami servisu ba, iha Child Fund prioridade hanesan saúde no edukasaun, ho servisu hamutuk ida ne’e ami bele promove liután dijitál literasia ninian ba iha joven, labarik sira no sosiadade tomak iha Timor, akordu kooperasaun ne’e ba tinan 3, tanba nia prioridade organizasaun entaun dalaruma nia kontinuasaun ba iha Child Fund orsida loraik ami sei iha servisu hamutuk ho Ministériu Educkasaun lansa School wWeb oinsá utiliza website sira iha escola,” Alzira sublina.
Entretantu, dadus husi Child Fund hatudu iha porsentu 50 respondente sira esperensia abuzu durante online no porsentu 30, sei asesu situi sira hanesan pornografia, tan ne’e realiza akordu ne’e hodi promove oinsá uza internet saudevel no seguru hodi labele fo impaktu ba vida.
Jornalista : Maria Jose
