Lafaek News—Forum Komunikasaun ba Feto Timor-Leste (Fokupers), Segunda 09/12/2024, husu ema hotu iha sosiedade Timor atu hapara violénsia baezia ba Jéneru hasoru feto no labarik iha Timor Leste.
Diretora Fokupers, Domingas Afonso Amaral, Timor-oan hotu tenke hamutuk prevene violénsia hasoru feto no labarik feto sira hodi promove igualdade jéneru no asegura feto nia direitu umanu liu husi empoderamentu ekonomia, tanba violénsia bazeia ba jéneru sai dezafiu no kontinua buras iha sosiedade Timor-Leste.
“Violénsia hasoru feto no labarik feto sira sai hanesan problema global, hanesan forma ida husi violénsia direitu umanu, partikularmente fó impaktu ba feto no labarik feto no komunidade sira nia moris, tan ne’e mak Fokupers servisu hamutuk ho World Vision Timor-Leste nomós Fundasaun Esperansa Enklave Oekusse (FEEO), liu husi parseria ida ne’e hodi fó apoiu ba feto sira iha komunidade rural liu husi projeitu ida ne’e hanaran promosaun Feto liuhusi Empoderamentu Ekonómiku no Direitu (Power),” Diretora Fokupers deklara.
Nia dehan, projetu ne’e rasik foka liu ba partisipasaun feto sira nian iha dezenvolvimentu ekonómiku liuhusi introduz atividade poupansa ba transformasaun, harii grupu agrikultur no fó apoiu emprezarial ba grupu agrikultura sira liu-liu feto no grupu marginalizadu sira inklui advokasia iha ámbitu selebrasaun loron importante sira.
“Domingas dehan, hamutuk ita prevene no hapara violénsia hasoru feto hodi promove igualdade jéneru no asegura feto nia direitu umanu liuhusi empoderamentu ekonómia, tanba ne’e mak objetivu husi atividade ida ne’e, atu hasa’e konsiénsia públiku hodi hapara violénsia hasoru feto no asegura kompremisiu estadu ba alokasaun orsamentu nomós politika ne’ebé sensivel ba jéneru liuhusi empoderamentu ekonomia feto iha Timor-Leste”. diretora fokupers akresenta.
Sorin seluk reprezentante Sekretaria Estadu Igualdade Jéneru, Elvina Souza Carvalho, hatutan joven foinsa’e sira husi universidade no eskola hirak iha Dili laran, entaun ita mós la sees husi ita nia parseiru interesante sira hanesan Organizasaun Nasional no Internasional ho autoridadelokal no lider komunitariu sira, tanba ita hatene katak papel importante iha sosiedade hodi hapara violénsia liu-liu atu impodera feto no ema marginalizadu sira.
“Ita iha orsamentu ne’ebé naton hodi implementa programa durante loron 3 nia laran, tanba kazu ne’ebé fokupers rejista iha Janeiru to’o Setembru tinan ne’e, hamutuk 280, maioria kazu sira ne’e mai husi violasaun fisiku, tanba ne’e mak ita iha akapamentu ba feto sobrevivente sira, liu-liu haree ba violénsia ne’ebé hasoru labarik sira, atu nune’e ita lori labarik sira ne’e mai hamutuk iha uma-mahon, tanba ita konsege akumula labarik sira ne’ebé hetan violénsia hamutuk 88, ne’ebé mak fokupers rejista durante ne’e, liu-liu husi munisipiu Ermera no Manufahi”. Elvina Souza Carvalho, hakotu.
Observasaun Lafaek News, iha terenu nota katak dialogu públiku husi atividade ne’e rasik, hetan partisipasaun masimu husi Diretora Fokupers, Embaixador EU, H.E, Sekretariu Estadu Igualdade, Membru Parlamentu Nasional, Diretor ADTL inklui Komandante PNTL.
Jornalista Magan : Natalia de Jesus
Editor : Agapito de Deus
