Lafaek News (Covalima)— Durante tinan barak ona Postu Saúde Alas Tehen, Suku Fatumea, Postu Administrativu Fatumea, Munisípiu Covalima kontinua infrenta menus rekursu humanu no transporte, hodi atende komunidade bainhira ba halo tratamentu saúde iha postu saúde refere.
Responsavel Postu Saúde Alas Tehen Tarsicio Pires Amaral, ba jornalista sira iha nia kna’ar fatin hatete, Durante ne’e iha Fasilidade Saúde Alas tehen iha de’it Partéira ida no Inferméiru ida nomós laiha Laboratóriu.
“Ami iha ne’e preokupa tebes liu-liu rekursu umanu menus, iha ne’e so iha de’it inferméiru ida ho partéira ida, inferméiru permanente so ha’u mesak, durante ne’e ami falla liu mak programa nútrisaun tamba pesoál iha ne’e laiha, ne’ebé araska tebes nomos laiha formasista no laboratóriu, se laiha laboratóriu oinsá mak bele hare’e kona-ba ra’an, tan ne’e ami presija tebes pesoál ka rekursu oinsá atu bele reforsa iha postu saúde ida ne’e,”Relata Responsavél Postu Saúde Alas Tehen Tarsicio Pires Amaral, (26/12/23.)
Responsavél Postu Saúde ne’e informa, kona-ba Transporte atu utiliza hodi fasilita servisu iha Postu Saúde Alas tehen iha motorizada ida de’it, maibé dau-dun ne’e kondisaun at ona.
Tan ne’e difikulta tebes servisu professionál saúde atu halo atendimentu ba pasiente sira no difisíl mós atu ba foti ai-moruk iha sentru saúdu hodi fó ba pasiénte sira ne’ebé mak ba hala’o tratamentu iha postu saúde Alas tehen, tamba ne’e husu ba governu liuhusi Ministériu Saúde atu fó atensaun liu-liu transporte.
Alende husu mós ba governu liuhusi Ministériu Saúde (MS) atu hari’i rezidezidénsia ba pertéira no medíku sira atu hela nune’e bele fó atendementu di’ak ba pasiénte sira.
“Tamba partéira ida agora dau-daun hala’o kna’ar iha Suku Fatumea ne’e hela iha Suku Belulik Leten dader maka foin mai, ne’ebé bainhira inan isin rua sira atu mai konsulta dalaruma sei hein tamba laiha transporteentaun difisíl atu atende inan isin rua sira ho lais satán kalan ne’e at liu,” informa Pires.
Enkuantu, Responsavel Postu Saúde Alas Tehen, rekomenda ba Ministériu Saúde atu tau planu hodi rekruta tán medíku no inferméiru, tanba iha Alas Tehen medíku laiha no menus emfermeru no pertéira.
Jornlista : Julio Salinas
Editor : Chamot Nahac
