Lafaek News—Samuel de Deus, hanesan foinsa’e ida husi Munisípiu Ermera Suku Katrai Kraik Aldeia Baulisuria Postu Administrativu Letefoho, ne’ebe nakonu tebes ho espritu patriota, hodi compete ho adversáriu sira seluk iha elisaun Suku period 2023-2029 ne’ebé ho lema katak, “Mai servi hanesan Xefe Suku no la mai ukun hanesan Liurai”.
Kontiudu hosi lema ne’ebé iha ho ninia signifikadu ne’ebé bo’ot tebes katak, atu sai servidór ida tenke servi ho fuan no laran, nomos tenke hatudu domin no responsabilidade iha komunidade nia le’et, nune’e bele lori prosesu dezenvolvimentu suku la’o ho di’ak.
Maibe, atu sai lideransa ida hodi lidera komunidade iha baze la’os buat ne’ebe kaman no fasil atu hala’o hanesan mos lideransa sira seluk, basa tenke hasoru dezafius no problema oi-oin iha komunidade sira nia le’et.
Maske konsidera katak, kna’ar Xefe Suku hanesan responsabilidade bo’ot ida kompara ho kna’ar sira seluk, maibe kandidatura Samuel lasente tauk no hakfodak. Samuel mos oras ne’e firme ona ho nia pozisaun, sekarik komunidade hosi Suku Katrai Kraik fó fiar, nia prontu atu sai liman ain estadu hodi responde ba problema no difikuldade ne’ebé komunida hasoru.
“Ha’u hakarak kandidata ha’u nia a’an bá Xefe do Suku, atu sai liman ain estadu nian iha baze, hodi hádia povu nia moris liu-liu komunidade suku Katrai Kraik, hanesan Katrai Karik oan ha’u konese muito bem komunidade suku Katrai Karik nia moris, iha buat balum halo ona maibe iha buat balun ne’ebé seidauk halo, Tamba ne’e oportunidade Di’ak bá ha’u hodi kandidata ha’u nia a’an ba Xefe Suku Katrai Kraik. sekarik komunidade Suku Katrai Kraik hili ha’u sai hanesan Xefe Suku maka, Ha’u sei mai servi hanesan Xefe Suku e La’os Mai servi hanesan Liurai, haktuir Samuel bá Lafaek News liuhosi Viatelefone iha ninia rezidénsia Kaixa Klandistina Datuk Ikun Salel Daumaumata Munisípiu Ermera, Kinta (12/10/2023).
Samuel reforsa, objetivu prinsípais hosi nia parte ne’ebé hakarak kandidata a’an bá Xefe Suku hodi luta bá dezenvolvimentu Suku Katrai Kraik nian. No prontu atu servisu hamutuk ho komunidae no Xefe Aldeia sira liu-liu Programa Nasionál Dezenvolvimentu Suku (PNDS). Alende, nia mos sei servisu maka’as hamutuk ho Xefe Aldeia sira hodi tulun oinsá fasilita di’ak liután komunidade sira nia deklarasaun iha Aldeia ida-idak nune’e komunidade sira labele la’o ho distánsia do’ok, sekarik komunidade sira fó fiar ba nia.
Samuel mos la’os ema foun iha Suku Katrai Kraik, maibe moris no bo’ot kedas iha Suku ne’e nia laran no ra’an hosi veteranu Luis Madeira de Deus Alias Pelomoris, ne’ebé uluk hamutuk ho maluk funu na’in Sira seluk ne’ebé luta hodi liberta Timor-Leste Hosi inimigo ka militár Indonézia.
“Tan ne’e, oan ha’u hakarak mai kandidata an hodi luta ba Dezevolvimentu komunidade Suku Katrai Kraik nian, nomos oinsá bele haree di’ak liután problema no difikuldade ne’ebé mak komunidade sira hasoru iha Suku ida ne’e,” nia hatutan.
Enkuantu, vizaun no misaun ne’ebé Kandidatura Samuel iha mak hanesan, konsolida demokrásia hametin páz no estabilidade liuhosi rezolusaun konflitu hodi reforsa dezenvolvimentu komunitária no misaun mak oinsá iha dever morál no responsabilidade núdar Xefe Suku ho mandatu determinadu. Alende hasa’e kualidade rekursu umanu liuhosi prezervasaun rekursu naturais ne’ebé hanesan rikusoin no identidade nasaun nian.
Entertantu, programa prinsípais ne’ebé kandidatura ne’e iha mak (1), (defende, asegura no promove uzu kustume tradisionál komunidade nian núdar rikusoin no modalidade ba nasaun nian. (2), atu garante funsionamentu administrasaun suku nian atu la’o ho di’ak no lais liu, no halo atribuisaun de kompeténsia bá Xefe Aldeia sira atu uza karimbu hodi fasilita komunidade. (3), halo reuniaun ordináriu fulan ne’en (6) dala ida nune’e bele hatene informasaun tuir situasaun ne’ebé mak membru komunidade sira hasoru iha aldeia ida-idak. (4), durante mandatu sei diskute klean hodi aprova programa prioridade hotu tuir proposta hosi Xefe Aldeia sira hodi implementa liuhosi Programa Nasionál Dezenvolvimentu Suku (PNDS). (5), sei halo koordenasaun ho parte kompeténsia hanesan tékniku social postu no munisipálnune’e bele halo pagamentu bá benefisiáriu sira hanesan idozu, difisiénte no seluk tan. (6), promove talentu juventude no membru komunidade. (7), sensebiliza no mobiliza membru komunidade. (8), serbisu hamutuk ho parte seguransa (PNTL), atu sensebiliza lei hodi halakon violénsia domestíka iha komunidade nia le’et.
Jornalista : Mateus Felisberto de Deus
Editor : Agapito de Deus
