Lafaek News—Movimentu Foin Sa’e Atsabe (MOFA) realiza Mini Seminario ho tema “Papel Foin Sa’e iha Vida Organizasaun Voluntáriu iha sosiedade hodi tulun malu hanesan umanu ne’ebé kuda solidariedade ba malu.
Iha semináriu ne’e Padre Bento Barros Perreira iha nia palestra hatete, ko’alia kona-ba papel foin sa’e sira ne’ebé iha vida voluntarizmu importante loos, katak voluntarizmu ne’e buat ne’ebé importante ida iha sosiedade nia laran hodi sira bele tulun malu nu’udar humanu ne’ebé iha solidadariedade ba malu.
“Sosiedade rasik mai ho nia karakter ida sosial, ne’e duni ema labele moris mesak deit, ho faktus sira ne’ebé maka akontese iha sosiedade nian, la’o sempre iha buat hot-hotu ksolok deit, maibé dalaruma mos buat hotu iha susar, dalaruma mos buat hotu iha dezastre, entaun presija iha buat espíritu voluntáriu atu ema sira ne’e bele tulun malu, bele aplika duni aspetu sosial nian iha ema nia a’an,” Pe. Bento Barros Perreira, afirma iha sábadu foin lalais ne’e.
Hodi dehan, espíritu voluntarizmu ne’e iha nia karakteristika rasik hamutuk sanulu, no iha prinsipiu ne’ebé konsege temi atu ema hala’o asaun voluntarizmu ba moris loro-loron nian.
“Hanesan ohin ha’u hateten mos, katak iha espíritu voluntáriu nian iha karakter lubuk ida ne’ebé ita iha, ne’ebé ohin ha’u temi, iha karakter sanulu, iha prinsipiu sira ne’ebé maka ha’u la konsege temi, maibé iha karakter hirak ne’e iha pergunta sira hamosu mos, ha’u resposta karakter sira ne’e, la presiza iha hotu mak ita halo karakter sira ne’e, balu ita moris mai ne’e hanesan iha ita nia a’an tiha ona, no ita kontinua ita nia buat hirak ne’ebé, maka iha ita nia a’an ne’e, bele ona ita hala’o ka, partesipa iha asaun voluntarismu ne’e iha ita nia moris,” nailulik ne’e salienta.
Ho nune’e, presiza iha meius komunikasaun no liu husi edukasaun ba sosiedade sira hodi bele hatene no saida mak espíritu voluntarismu, no prátika, liu husi diálogu iha sosiedade sira rasik.
Ikus liu ne’e Padre Bento husu joven sira hodi aproveita ba oportunidade aprende nafatin partisipa iha asaun voluntarizmu ruma, tanba oportunidade la’os mai bei-beik, maibé mai dala ida de’it, husu joven sira hodi aproveita no halo buat ruma iha sosiedade nia leet.
Jornalista : Jhon
Editor : Aniceto Dias
