Lafaek News—Prezidente Repúblika (PR) José Ramos Horta, tersa (14/02/2023) hala’o asaun karidade hodi tulun vítima ne’ebé ahi han motuk tiha sira nia uma iha suku Bekora postu administrative Kristu-rei munisípiu Dili.
Horta dehan, hanesan aman ba povu no nasaun ne’e, uza orsamentu privadu hodi sosa nesesidade tulun vítima hodi hakmaan sira nia sofrementu, lolos ne’e kompeténsia Ministériu Solidariedae Sosiál no Inkluzaun (MSSI).
“Ohin ne’e la’os presidente repúblika nia mandatu ka nia responsabilidade ne’e instituisoens estadu nian hanesan dezastre natural, solidariedade sosial nia responsabilidade, ha’u lori de’it hanesan bai-bain tulun ruma husi orsamentu prezidensiál nian rasik mak ita hotu-hotu hatene prezidénsia nia orsamentu ka mandatu la’os ba ida ne’e,” Presidente Repúblika PR Ramos Horta katak ba jornalista sira iha Bekora, tersa (14/02/2023)
Xefe Estadu ne’e hateten, povu ne’ebé sofre ahi han sira nia uma lakon sira sasan uma laran, ne’e prezidente repúblika prontu halo, tan ne’e PR nia marka presensa hodi hare’e nia povu ne’ebé kiak, no lakon buat hotu-hotu inklui labarik sira ne’ebé hamutuk atus ida resin lakon ropa lakon livru ne’ebé asesu ba edukasaun.
“Ha’u mai ema sira ne’e kiak rabat rai lo’os, lakon buat hotu-hotu i pior liután labarik sira lakon ropa lakon sira nia livru ka kadernu tantu labarik lubuk ida hamutuk elementu atus ida resin, ne’e duni hau sei hare agora lori ajuda ituan” katak PR
President repúblika argumenta katak, fila fali ba palasiu hodi orienta ba saneamentu privadu hodi halo limpeza ba fatin inséndiu ne’e.
“Agora fila ba palasiu haree kedas ha’u bolu kedas saneamentu privadu kompaña privadu presidénsia bele selu para sira mai halo limpeza didiak tanba sira komapaña ida komersial profisional diak sira halo servisu diak para haree mos aproveita hamos liu tan Bairo ida ne’e tanba la’os lixu deit mai husi insendiu ne’e,” PR Horta tenik.
Iha Sorin Seluk, Fernanda Floriana de Oliveira, hatoo nia agradesimentu ba Xefe Estadu ne’ebe tun diretamentu hodi haree no tulun nia povu hirak be hasoru difikuldade.
“Agradese ba nain hirak nia presensa iha ne’e hamutuk ho nain prezdente ne’ebé ohin tau matan ka hare’e rasik ho matan iha ami no familia ne’e sanulu resin hitu 17 ne’ebé hetan uma ahi han ida ne’e” Fernanda Floriana de Oliveira afirma ba jornalista iha suku Becora.
Fernanda hateten, hakarak fo sai ba akontesimentu ahi han uma ho nia oan mane ne’ebé ho defisiente fisiku iha fatin laran, no viziñu hakilar hodi dehan sai ho ida ne’e inan defisiente ne’e halai sai ahi han duni uma husi viziñu sira nian, no inan defisiente ne’e halai fali ba uma laran hodi taka kontador no salva oan defisiente ne’e.
Jornalista : Aniceto Dias
Editor : Agapito de Deus
