(Artigo Ida Ne’e Analiza Kona-bá Partido Politiku Ne’ebé Mak Bele Tur Kadeira Mamar iha PN)

 Hosi: Moisés Vicente

Agora daudaun atuál Prezidente Repúblika (PR), Dr. José Manuel Ramos Horta halo hela enkontru ho lider partidu polítiku sira hanesan Partido Democrático (PD), Partidu Libertasaun Povu (PLP), Partidu KHUNTO, Partidu União Democrática Timorense (UDT), Partidu CNRT, partidu FRETILIN, partidu Frente Mudança (FM), partidu PUDD, nomos partidu polítiku sira seluk-seluk tan, Uma Kreda, Sosiedade Sivil, Lider Komunitariu sira, molok tun ba halo kampanye iha povo nia leet. Oinsa mak partidu polítiku ida-idak hato’o nia programa ba Prezidente Repúblika hodi bele hatene, saida mak atu halo, wainhira manan iha eleisaun Parlamentar ba tinan lima oin mai.

No partidu polítiku balu mos komesa halo ona konferensia nasional kada partidu ida-idak nian. Besik ona festa demokrasia no eleisaun Parlamentar iha tinan 2023 ida ne’e, ba partidu polítiku sira ne’ebé existe iha Timor-Leste komesa husi partidu ki’ik sira to’o partidu bo’ot sira, sira hotu sei prepara-an atu simu festa demokrasia ne’ebé mak kada tinan lima sempre hala’o iha ita nia rai doben Timor-Leste. No ita hotu hein, bainhira mak atuál Prezidente Repúblika (PR), Dr. José Manuel Ramos Horta halo nia Dekreta loron kalendariu eleisaun Parlamentar nian. Iha mundu, se aplika sistema demokrasia ne’ebé hanorin ba ema hotu katak desizaun ne’e mai husi povo, ba povo no fila-fali ba povo.

Matenek na’in balu husi Kranemburg halo definisaun katak demokrasia tuir nia signifikadu katak Governasaun ka Estadu nain mak povo rasik. Kranemburg define a democracia de acordo com seu significado básico, ou seja, governar o povo.  (Kranemburg mendefinisikan demokrasi sesuai dengan pengertian dasarnya, yakni memerintah rakyat). Nomos matenek na’in Abraham Lincoln dehan katak demokrasia ne’e governasaun mai husi povo, husi povu no ba fali povu. Segundo Abraham Lincoln, a democracia é o governo do povo, pelo povo e para o povo. (Menurut Abraham Lincoln, demokrasi merupakan pemerintahan dari rakyat, oleh rakyat dan untuk rakyat).  

Partidu ida ne’ebé mak bo’ot liu iha Repúblika Demokrátika Timor-Leste (RDTL) mak, partidu Frente Revolucionário de Timor-Leste Independente (FRETILIN) no partidu Congresso Nacional de Reconstrução de Timor (CNRT). Partidu polítiku bo’ot rua ne’e ita bele dehan El-clasico ona iha Timor-Leste. Depois partidu ki’ik oan sira komesa dolar ona, maibé sei harame deit iha tempu kampanye nia laran deit no bele mos partidu rua ne’e FRETILIN no CNRT mak sei manan no sira sei halo raut tasu no sei halo koligasaun ba malu ho partidu bo’ot rua ne’e hodi tur iha Parlamentu Nasional (PN) no hodi hare Governasaun foun ba tinan lima ne’ebé sei mai ne’e, ka IX Governo Konstitusional mai ne’e besik ona odomatan Palacio do Governo nia oin.

Baze legál iha Konstituisaun da República Democrática de Timor-Leste, artigu 7 (sufrájiu universál no multipartidarizmu), 1. Povu hala’o nia kbiit polítiku liu hosi sufrájiu universál livre, diretu, sekretu no periódiku, no liu husi forma seluk tan ne’ebé hakerek ona iha Lei-Inan. 2. Estadu fó valór ba partidu polítiku sira-nia kontribuisaun atu povu hakatak-sai nia hakarak rasik tuir organizasaun, no ba sidadaun nia partisipasaun demokrátiku iha hahalok ukun nian iha nasaun laran. Nomos iha Konstituisaun da RDTL artigu 92 hatete katak, Parlamentu Nasional (PN) mak órgaun soberania Repúblika Timór-Leste nian ne’ebé reprezenta ema Timor-oan tomak, iha kbi’it atu halo lei, atu fiskaliza no atu halo desizaun polítika. Iha artigu 106 Konstituisaun da RDTL hatete kona-bá (Nomeasaun), 1. Primeiru-Ministru hili hosi partidu ida ne’ebé iha votu barakliu ka hosi aliansa partidu sira-ne’ebé iha nia ema barak iha Parlamentu no iha nomeasaun hosi Prezidente-Repúblika, wainhira rona tiha partidu polítiku sira ne’ebé iha reprezentante sira iha Parlamentu Nasionál. 2. Membru Governu sira seluk, Prezidente-Repúblika mak sei hili liu husi Xefe-Ministru nia proposta. (1. O Primeiro-Ministro é indigitado pelo partido mais votado ou pela aliança de partidos com maioria parlamentar e nomeado pelo Presidente da República, ouvidos os partidos políticos representados no Parlamento Nacional. 2. Os restantes membros do Governo são nomeados pelo Presidente da República, sob proposta do Primeiro-Ministro).

Iha sorin seluk, tinan ida ne’e, tinan sorte ba ema ho difisiensia matan bele vota. Iha ne’ebé Comissão Nacional Eleição (CNE) informa katak agora daudaun prepara hela pareser ruma, hodi bele autoriza ema ho defisiensia hato’o ninia vota iha eleisaun Parlamentar, Prezidente CNE, José Agostinho da Costa Belo, komenta ho Sekretariu Tekniku Administrasaun Eleitoral (STAE), foin lalais halao sira nia estudu iha Jakarta (Indonesia), katak ema ho defisiensia sira ninia sentimentu hanesan sidadaun hotu-hotu, nune’e sira ninia rasional fó rasik sira ninia votu. (Fontes: Jornal Timor-Post, 03 Fevereiru 2023).

Tuir relatóriu husi Democracy Index of Each Country in Southeast Asia (2011-2021) hatudu katak Timor-Leste nia Democracy index 7.9. Ita halo komparasaun demokrasia iha Timor-Leste diak tebes kompara ho nasaun sira seluk hanesan Myanmar, Singapura, Filipina, no nasaun seluk-seluk tan demokrasia lao ladun diak. Iha ne’ebé Timor-Leste nia sistema demokrasia foin hahu lolos iha tinan 2002 depois Timor-Leste hetan ninia restaurasaun da Independensia Timor-Leste nian ne’ebé entrega husi tranzisaun husi Organizasaun Nasoens Unidas (ONU) iha tempu ne’ebá. No Timor-Leste nia demokrasia lao kapas tebes, lao tuir dalan legal sistema demokrasia nian. Iha ne’ebé, Estadu Timor-Leste, halao eleisaun Prezidente Repúblika no eleisaun Parlamentu Nasional sempre tinan lima (5) tenke halo duni eleisaun ba orgaun soberanu rua ne’e, Prezidente Republika no Parlamentu Nasional, inklui mos eleisaun ba Chefe do Suco sira iha Timor-Leste.

Iha lidun seluk, isu balu dehan sei adia eleisaun parlamentar to’o iha fulan Setembru 2023, Deputadu Assanami konsidera Governu ho Parlamentu ilegal, tan liu ona prazu. Kestaun ne’e hato’o Deputadu Bankada Partidu Democratico, Mariano Asanami Sabino ba STL iha PN, Dili, Segunda ne’e (06/02/2023). “Ita bele dehan instituisaun Estadu hanesan Governu ho Parlamentu ilegal ona se adia to’o fali Setembru, tanba liu tiha prazu ona,” dehan nia. Nia hatete, iha konstituisaun dehan klaru tiha ona laiha diskusaun ema hotu bele interpreta, partidu sira lalika aumenta ninia opiniaun rebo-rebo hodi kontra fali Konstituisaun, no labele hatoman aan kontra konstituisaun, tanba konstituisaun mak aliserse estadu. “Tanba iha neeba klaru tinan 5 mandatu remata, i dia 13 fulan Junhu kuandu ami tama plenaria, primeriu mak too fali dia 13 fulan Junhu remata ona, tanba nee elisaun tenki antes dia 13 fulan Junhu para iha dia 13 ka 14 fulan Junhu deputadu foun tama ona,” esplika nia. (Fontes: Jornal STL, 06/02/2023).

Boatos ida ne’e pelo kontrariu iha públiku nia leet, Prezidente Repúblika, Dr. José Manuel Ramos Horta kuandu Dekreta Kalendariu Eleisaun Parlamentar hodi akontese iha fulan Maiu, hanoin bazeia ba konstituisaun, juridiku no solene. Konstitusionalista Timoroan, Alexandre Corte Real de Araújo komenta, Prezidente Repúblika tenke la’o tuir korredor konstituisaun. Iha Konstituisaun da RDTL Artigo 86 alinea C hatete konstituisaun atribui kna’ar ba Xefe Estadu, atu deside kalendariu eleisaun Parlamentar, tuir konstituisaun haruka. Tuir regra konstituisaun, Artigu rua mak afeta Artigo 99 ho Artigo 93. Iha Artigo 93 katak tinan lima nia laran reprezentante povu halao kna’ar nu’udar Deputadu. Enkuantu, remata ona tinan lima, avansa fali ba eleisaun atu halo fali kna’ar foun. Artigo 99 katak lejizlatura ida kontein lejizlativu lima, kada lejizlativa ida ninia durasaun tinan ida nian. Konkluzaun katak, lejizlatura dalimak iha tinan lima, to’o agora mandatu lejizlatura dalimak hotu ona. Tuir termu konstituisaun Xefe Estadu bele deside atu halo Eleisaun Parlamentar hahu iha fulan Maiu nia laran. (Fontes: Jornal Timor Post, 08/02/2023). 

Ikus liu rekomenda ba estado República Democrática de Timor-Leste (RDTL) katak, diak liu kontinua haburas sistema demokrasia iha ita nia nasaun Timor-Leste. Tuir hakerek nain nia hare’e katak sistema demokrasia mak diak liu kompara ho sistema sira seluk. Ita halo komparasaun sistema governasaun iha mundu iha tipu sistema governasaun tolu, maka sistema governasaun Autoritariu ka Monarkia, sistema governasaun Aristokrasia no sistema governasaun Demokrasia. Entre sistema Govermental tolu ne’e, ba nasaun Timor-Leste sistema governasaun Demokrasia mak diak liu, husi sistema sira seluk ne’e.  

*Hakerek Na’in: Alumni Universidade da Paz-(UNPAZ), Faculdade de Direito no Alumni Instituto Superior Cristal-Departemento Sociologia no Ativista. Artigo ida ne’e la representa institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoál. Iha sujestaun ruma bele haruka iha telefone +67077291406 ou e-mail: moisesvicente59@yahoo.com