Lafaek News—Defisénsia fíziku, Evaristo Lopes, hadook an husi inan-aman no família sira nia leet dezde tinan 1999-2023, hakmaan moris iha Rádiu Komunidade Lospalos.
Mane oan ne’e husi aldeia Mane-Ikun, suku Baduho postu administrative Venilale munisípiu Baukau, idade 38 ona, hala’o nia mors mes-mesak iha Rádiu Komunidade Lospalos (RKL), família sira ladún buka tuir maske hatene Evaristo iha hela munisípiu Lautém hodi hala’o nia servisu nu’udar seguransa iha rádiu komunidade ne’e.
Evaristo hatene moris iha mundu ne’e provijóriu de’it no buat hotu sei remata bainhira hakotu ona peregrinasaun, ohin loron moris dook husi família tanba moris mak obriga, maske kondisaun fíziku difesiente, maibé nia esforsu nafatin hodi moris serbisu hanesan seguransa no mós tekniku iha Rádiu Komunidade Lospalos hodi moris di’ak ba loron naruk nian.
Evaristo moris iha Venilale 15/05/1985, husi inan Margarida Guterres (Matebian) no aman José Lopes (matebian) Evaristo iha maun alin 8, feto 4 mane 4, sira seluk hela iha Venilale no nia deside ba hela iha Lospalos, ho razaun tanba inan-aman sempre baku hela de’it nia nune’e nia deside hela ho ema seluk no husik hela nia hela fatin.
“Iha 1999 ha’u sai husi uma Venilale no hala’i ba Dili kuaze fulan balu iha Dili, haree ba situasaun ladiak ho funu nune’e ha’u deside mai Baukau, maibé ha’u atu ba uma ha’u nia laran todan loos tanba tauk apa ho ama baku ha’u nune’e, ha’u haree bemo mai Lospalos ha’u tuir mai de’it no too iha Lospalos familia sira iha rasa mak hili ha’u no hela ho sira too ha’u deside mai fali iha kota Lospalos iha 2006 kolega sira iha Radio Komunidade Lospalos bolu ha’u hodi serbisu iha Radio no agora ha’u serbisu no hela permanente iha radio komunidade Lospalos,” katak defisiénsia Evaristo Lopes ba lafaek news iha nia servisu fatin rádiu komunidade Lospalos foin lalais.
Evaristo Lospes hateten ho triste hodi dehan nia moris tomak ne’e depende ba kolega sira de’it no no servisu ba an rasik, maske ema ho defisiénsia, maibé labele tane liman ba ema seluk hodi hamonu dignidade hanesan ema.
“Ha’u hela iha rádio Lospalos ne’e buat hotu jestór rádio mak jere hodi nune’e ha’u bele han no hemu inklui mós ha’u bele halo servisu ba iha rádiu ida ne’e foin lalais tinan kotuk ha’u ba ona iha família sira iha Venilale vizita maun alin sira iha ne’eba i agora ha’u fila fali ona mai Lospalos hodi halo serbisu iha rádio komunidade ne’e,” katak Venilale oan ne’e.
Jestór Rádiu Komunidade Lospalos, Nascimento provínsial ba lafaek news hateten, Evaristo Lopes agora nia serbisu iha rádiu komunidade Lospalos sai hanesan funsionáriu permanente dezde rádiu ne’e eziste ohin loron.
“Ami bolu nia mai serbisu iha rádiu komunidade ne’e hahú husi 2006, tanba ami haree ba nia mai hela ho ema no husik tiha nia iha uma besik ne’e, nune’e ami bolu nia mai ami hamutuk serbisu iha ne’e too agora, ami fo mós insentivu ruma ba nia, hodi hola nia nesesidade sira fó mós fatin ba nia toba iha ne’e, nia família sira mai buka tuir no ha’u aprezenta ona ba família sira no tinan kotuk ha’u husik nia bá feriadu ho nia família durante fulan 7 iha Venilale agora nia mai ativu fali serbisu hanesan babain,” katak Jestór Rádiu Komunidade Lospalos, Nascimento Provincial.
Evaristo Lopes, iha peregrinasaun laiha hala’o nia estudu, Inan-aman ladún fo importansia tan de’it kondisaun defisiénsia inklui kondisaun ekonomia família ladún sufisiénte, maibé nia iha matenek hodi halo operasaun ba rádiu no bele kaer mós komputador inklui mós nia bele halo kobertura mós ba notisia, nia kondisaun fíziku ne’ebé iha, sempre buka nafatin meus oinsá atu estuda hodi sustenta nia moris.
Tuir Evaristu hateten nia sai mós benefisiariu ba iha ema ho difisiente nian ne’ebé oferese husi governu nune’e husu kona ba nia atu fila fali ba Venilale, maibé labele fila ona, tanba oras ne’e nina hala’o servisu permanensia iha Rádiu Komunidade Lospalos.
“Ha’u serbisu ona iha ne’e no tempu iha mak vizita família sira de’it,” Evaristo hakotu lia ho jornalista Lafaek News iha nia kna’ar fatin Rádiu Komunidade Lospalos.
Jornalista : CE. Lautem
Editór : Agapito de Deus
