Lafaek News—Universidade Oriental Timor-Lorosa’e (UNTAL) hamutuk ho Universidade Citra Bangsa Kupang Indonesia (UCBKI), loke formasaun etapa dahuluk ba estudante UNITAL 1200 periodu 2023.
Reitor UNITAL, Florindo Perreira esklarese aktividade ba palestra estudante foun 2023, atu servisu hamutuk ho Universidade Citra Bangsa Kupang Indonésia (UCBKI) ne’ebé relasaun ho saúde nian iha universidade oriental.
“Atividade ohin ne’e fo palestra ba estudante foun sira tanba ita servisu hamutuk ho Universidade Citra Bangsa iha Kupang, ne’ebé iha relasaun ho saude ninian entaun ami mos konvida Ministra Saude hodi hato’o liafuan ida ka rua ba estudante foun sira, hodi bele halo di’ak ba eskola ida ne’e,”Reitor UNITAL, Florindo Perreira dehan iha Salaun Auditorium UNITAL, Bekora, Tersa(24-01-2023)
Nia hatutan, nune’e mos konvida Institutu Citra Bangsa Kupang Indonesia hodi akapta ba programa atu bele kompete hamutuk parte saúde nian bele prátika iha area saúde nian.
“Ita koopera ho Universidade la’os ho Universidade Citra Bangsa kupang Indonesia de’it, maibé ho Universidade sira seluk ne’ebé uluk mos mai tiha ona no balun atu mai tan, ita mos atu halo planu hodi haruka ita nia estudante balun no Dosente sira hodi ba kontinua estudus Mastradu no Doutoramentu iha Universidade ne’ebé ita asina akordu ona ba area saúde nian”, nia dehan.
Ikus liu nia dehan, totál estudante ba etapa dahuluk hamutuk 1200, no tuir etapa daruak no datolu, ho ida ne’e fakuldade hamutuk 7, Fakuldade Saúde, Edukasaun, Agrikultura, Enjenária, Ekonomia, Direitu no Siénsia Politika.
Observasaun lafaek news nota serimonia abertura formasaun saúde ne’e hetan partisipa direta husi Ministra Saúde, Odete Maria Freitas Belo, no natureza husi formasaun ne’e rasik atu estabelese servisu hamutuk UNITAL ho Universidade Citra Bangsa Kupang Indonesia (UCBKI) hodi kaderniza estudante sira iha area saúde.
Jornalista : Adolfina Soares
Editor : Agapito de Deus
