Lafaek News—Prezidente Repúblika José Ramos-Horta husu sidadaun kuidadu animal labele estragus ai-kameli tanba konsidera importante tebe-tebes folin no valór boot pertense lori investimentu ba futuru Timor Leste.
“Ai kameli folin, valór boot loos, maibé ne’e laos hanesan ita kuda ai farina, Ai dila mais ou menus lori tinan 20 nian laran nia bele iha kualidade prontu hodi bele koa, ne’e duni investimentu ba tuturu, ita hanoin ba Futuru joven sira ne’ebé mak ohin partsispa iha ne’e, ita ko’alia kona-ba investimentu ba Futuru Ai kameli mos pertense ba iha ne’e, no mos Ai seluk_seluk tan,” PR Josè Ramos-Horta husi diskursu iha serimónia nasionál Sândalo no Floresta iha Jardim dos Herois Metinaru Sesta ( 13/01/2023).
Xefe Estadu ne’e apela ba sidadaun hotu-hotu haree animal hanesan Fahi, Bibi, labele sobu ai sira ne’ebé halo kampania iha Timor Leste tomak pior liu kontra reflorestamentu kampania mak animal tanba la tau iha luhan, labele husik iha fatin publika hodi estraga aihoris.
“Kampania ne’e tenki boot la bele para, Munisípiu sira ne’ebé iha autoridade ou tenki governu halo lei ida autorizasaun ida ba PNTL hanesan fahi ruma estraga aihoris sira tiru mate, lori ba polisia mak han ou lori ba ospitál, uluk halo ona hanesan ne’e, bele implementa iha futuru selae ai horis ne’ebé ita kuda estraga hotu”, deklara Xefe Estadu Ramos-Horta.
Entretantu Xefe Estadu Horta ne’e mos haktuir Kampania ba oin PR mos sei haree mos ho governu ho arte marsiais sira oinsa mobiliza artemarsias sira sai hanesan volontariu kuda ai, Ai fuan, ai-funan, hadia eskola sira iha Timor laran tomak.
Vise Ministru Agrikultura no Peskas Abílio Xavier de Araújo iha nia intervensaun reforsa, Ministériu Agrikultura no Peskas la mesak atu dezenvolve ita nia Floresta iha rai TL maibé hamutuk ho entidade sira hotu-hotu hodi bele dezenvolvimentu hotu-hotu.
“Ami hatoo agradesementu ba PR tanba iha observasaun katak nasaun ne’e atu sai matan no di’ak koko atu senti anin ne’ebé di’ak be labele maran mak ho inisiativa Presidente Repúblika nian ne’ebé mak iha bele servisu hamutuk ho Ministériu Agrikultura ho Peskas hodi bele dezenvolve ita nia refloresta iha ita nia rai hodi fo matan ba ita nia rai sai di’ak liu”, dehan Vice Ministru Agrikultura no Peskas Abílio.
Tuir Governante ne’e foin dahuluk MAP bele hetan kooperasaun ida ho Presidente Repúblika iha tinan ida ba kotuk 2022 inisia mos iha 2023 ohin selebra loron nasionál nian ba iha Ai sândalo no mos Floresta.
“Ohin iha ne’e ami prepara hela Ai kameli hun 200 ne’ebé mak bele investe iha fatin ita nia restus mortais sira nian fatin ne’ebé mak agora preparadu hein mos atu iha nia kontinuidade tuir natureza ne’ebé mak iha fatin ne’e bele ezizi hodi bele dezenvolve liu tan,” katak vise MAP ne’e.
Hodi dehan, Ministériu Agrikultura no Peskas hein atu bele suporta Ai horis saida de’it tuir iha terenu ne’ebé husu bele atu dezenvolve Ai horis di’ak liu iha Timor Leste.
Enkuantu iha serimónia nasionál Ai kameli no Floresta iha Jardim dos Herois Metinaru ne’e partisipa husi Estudante universitáriu sira hanesan UNPAZ, UNTL, Undil, administrador husi postu administrativu Cristo- Rei, Dom Aleixo, Metinaru, Verde Kruz no Nain Feto, xefi suku Mantelalao no eskuteru sira no komunidade sira husi Metinaru nian no membru governu balun.
Jornalista : Rita Moniz
Editór : Agapito de Deus
