Lafaek News-Partidu Demokrátiku (PD) sempre aposta ba ninia forsa rasik hanesan forma ida atu nafatin dinamiza demokrasia iha rai Timor, PD la tama iha esperiénsia ida ne’ebé monta uluk forsa hodi bele prova de’it ho rezultadu eleisaun.
Asuntu ne’e hato’o husi Sekretáriu Jerál Partidu Demokrátiku (PD) Antonio da Conceição ” Kalohan” bainhira ho ekipa hasoru malu ho Prezidente Repúblika José Ramos-Horta iha Palásiu Prezidensiál Sesta (12/01/2023).
“Hanesan PD seida’uk la’o too iha ne’eba, tanba PD seida’uk iha esperiénsia ida koligasaun antes de eleisaun, hanesan imi hotu akompania durante ne’e PD sempre aposta ba ninia forsa rasik hanesan forma ida atu nafatin dinamiza demokrasia iha rai ida ne’e, PD la tama iha esperiénsia ida ne’ebé mak monta uluk forsa para depois hodi bele prova de’it ho resultadu eleisaun nian,” Sekretáriu Jerál Partidu Demokrátiku Antonio da Conceição ” Kalohan” .
Tuir Sekjer PD hateten, PD sei nafatin ho hanoin ida katak Partidu Demokrátiku tenke lao, atu nune’e konkista podér ne’e liu husi eleisaun, maibé mos halo prosesu edukativu ida atu povu hola responsabilidade ba nia destinu rasik bainhira ba vota.
“Tanba ida ne’e mak laiha hanoin ati forma koligasaun au mesmu tempu mos ami hatene dehan katak sira ne’ebé mak boot liu mos seida’uk iha vontade hanesan ita hotu hanoin hela ba ne’e”.
Iha enkontru ne’e mos ekipa Partidu Demokrátiku husu konsellu ba Presidente Repúblika José Ramos-Horta tanba PD la’os foun, hein katak tinan polítiku ne’e bele iha mudansa di’ak ruma iha rai ida ne’e hodi nune’e bele hala’o di’ak dezenvolvimentu iha rai ida ne’e asegura ezistensia atu bele lori halo konvivensia iha mundu internasionál entre Timor Leste.
“Husu Konsellu ba Presidente Repúblika José Ramos-Horta tanba ami la’os partidu foun ami hein katak tinan polítiku ne’e bele iha mudansa di’ak ruma iha rai ida ne’e hosi nune’e ita hotu bele hala’o di’ak dezenvolvimentu iha rai ida ne’e bele asegura ita ninia ezistensia nu’udar nasaun atu bele lori ita ba halo konvivensia iha mundu internasionál maibé mos entre ita iha Timor Leste”, dehan Sekjer Partidu PD Kalohan
Jornalista : Rita Moniz
Editór : Agapito de Deus
