Lafaek News—Sente fuan taridu ho triste loro-loron, bainhira hasoru udan ho anin, toba la dukur, tuur de’it mos seguru haree ba kondisaun uma didin anin lori udan been sulin husi hadak leet ba uma laran no mos turuk husi kakuluk habokon uma laran hanesan debu no rai dodok susar loos atu deskansa ho hakmatek iha kalan.
Inan feton kbiit laek, Sansa Brito ho nia kaben Domingos da Silva Verdial (moras mental), hela iha aldeia Leotelo B, suku Mauxiga, postu administrativu Hatu-builuko, munisípiu Ainaro, xefe suku ho xefe aldeia alista tiha inan feton kbiit laek nee nia naran atu hetan Uma Kbiit Laek (UKL), maibé too iha dalan klaran, naran lakon derepente de’it, ema seluk ne’ebé nara foti ikus mak hetan fali Uma Kbiit Laek
“Maske ha’u rejistu ona uma UKL nian iha aldeia Leotelu ne’e ha’u maka hetan primeiru, maibé too agora sira seluk maka hetan uma UKL ne’e, hau labele hetan, no hau triste tebes tanba sá maka hau nia uma labele halo,” Katak Sansa ba jornalista iha rejidénsia Leotelo Mauxiga Ainaro foin lalais.
Loron-loron inan kbiit laek ne’e, hamos preta ema nia toos, loron ida dolar rua sentavus lima nulu, hodi sosa fali foos hakanuk lata ida rua hodi sustenta netik moris loro-loron nian.
Sansa Brito ho idade 61 ho nia kaben Domingos Soares Verdial idade 65 ne’ebé moris ho kondisaun saúde ladún diak (Moras Mental) durante tinan barak nia laran, Domingos la’o tun sa’e, no husik hela nia kaben Sana moris hanesan maluk laiha.
Uma klobor oan ne’ebé Sansa hela da-daun, airin kantu hat ne’e halis hotu ba uma oin, duut manlae ne’ebé suku iha uma leten dodok, no hadak didin nakles haleu husi sorin ba sorin, anin huu borus ho udan, la hakmatek.
Inan feton ne’e, maske ho kondisaun defisiénsia, esforsu an buka osan liu husi preta ema nia toos ho loron ida $ 2,050 sentavus, laiha dalan seluk ba nia atu moris, naran katak bele moris hanesan ema seluk, osan rahun ne’ebé hetan husi preta toos ne’e, sosa de’it foos karon 25KG ida mos la too, tenke sosa haknauk husi kios kiik hirak ne’ebé besik hodi han netik iha kalan.
Duut iha uma kakuluk nabeen hotu ona, udan monu husi lalehan monu kedan iha uma laran, didin ne’ebé kuak Sansa ho nia kaben sulan ho ropa at husi didin leet nune’e satan anin labele borus husi liur ba uma laran, dala ruma toba de’it iha ahi matan lalian tolu nia sorin too dadeer kontinua servisu ba vizinu sira nia toos.
Dala ruma kalan tuur iha nakukun laran, bainhira laiha lilin lolon ida, maske fiu eletrisidade dada besik husi sansa nia uma oin, labele instala tama iha nia uma ho razaun uma sei taka ho duut, tenke hein too Sansa hetan ona uma kbiit laek hafoin bele halo instalasaun eletrisidade dala ida de’it.
Sansa ho nia kaben Domingos (Moras mental), hela iha uma ida ne’ebé la dignu hanesan povu iha direitu moris iha kondisaun dignu tuir konstituisaun hateten nanis ona, maibé situasaun iha baze diferente ho testu ne’ebé hakerek iha konstituisaun.
Ho situasaun ne’ebé inan fetin kbiit laek Sansa ho nia kaben Domingos hasoru, lafaek news tenta konfirma ho xefe aldeia Leotelo B, maibé telephone fora husi area kobertura, lafaek news uza mekanizmu seluk hodi kontaktu direta Xefe suku Mauxiga liu husi Medos (Whatsaap), maibé haree de’it la resposta too ohin loron.
Jornalista : Nonya
Editor : Agapito de Deus
