Lafaek News—Extensaun Kapela Misionariu Uatulari antigu ne’ebé harii iha tinan 1972, too ohin loron kondisaun la merese ona ba sarani Uatulari oan sira utiliza hodi hala’o atividade fiar nian bainhira iha tempu udan no anin boot.
Paul Soares nu’udar presidente konsellu parókia Uatulari hateten durante ne’e sarani sira utilizá de’it kapela antigu ne’ebé ho kondisaun aat hodi hala’o nafatin sira nia fiar nu’udar sarani katólika.
“Durante ne’e ami halo esforsu ona hamutuk ho komisaun organizadora ho sarani sira hodi buka meius oin-oin hodi aranja kadeira sira hodi sarani sira utilizá iha tempu missa, kona-ba kondisaun kapela ita haree aat tebes ona hanesan kaleen komesa nakloke, ai mós komesa dodok ona no parede sira komesa nakfera dadaun ona maibé sarani sira nafatin utilizá hodi hala’o missa domingo iha laran no ida ne’e fó risku tebes ba ema nia vida,”dehan Paul Soares ba lafaek news, iha Igreja Antigu Uatulari, kinta (03/11/2022.
Entretantu presidente konsellu ne’e haktuir durante ne’e parte autoridade igreja no governu seidauk mai haree kondisaun kapela ne’e too ohin loron.
“Durante ne’e parté governu ida seidauk mai haree kondisaun Kapela ne’e rasik, tán ne’e kapela ne’e kondisaun nafatin aat nune’e, tán ne’e parté komisaun organizadora iha ona planu iha tinan kotuk hodi halo kobransa ba sarani sira husi suku rua mak hanesan suku Afaloicai iha aldeia (10), no husi suku Babulo aldeia (8) nune’e sira bele fó kobransa tuir sira nia kbiit, nune’e osan husi sarani sira ne’ebé agora dadaun iha mak hamutuk $1.281 dollar hodi nune’e sarani no autoridade lokal sei servisu hamutuk mós emprezariu sira balu hamutuk hodi hadi’a fila-fali kapela ne’e iha futuru” hatutan Paul Soares
Iha parté seluk reprezenta Sarani Uatulari Madalena Fernandez da Silva sente la konfortavel kondisaun igreja refere bainhira partisipa iha atividade misa.
“Ha’u nu’udar sarani iha ne’e senti la konfortavel tiha ona ho kondisaun Kapela ne’e rasik maromak ne’e esperitu Ida, ita ema moris hanesan material ho ita nia isin lolon ita tauk atu utilizá uma kreda ne’ebé mak ho kondisaun kalen anin sobu ona, maibé komu kondisaun seluk laiha, entaun uzá fiar de’it mak ita tur iha uma kreda refere atu udan tau mós naran katak ita tur iha laran para hahi no agradese nafatin ba maromak” dehan Reprezentante sarani Uatulari.
Madalena Fernandez da Silva hateten sarani Uatulari prontu apoiu material no servisu hamutuk ho autoridade lokal no komisaun organizadora hodi bele halo halo rehabilitasaun ba kapela refere.
“Ami sarani sira prontu apoiu material hanesan sementi kalen no material sira seluk importante komisaun organizadora mak tenke book aan uluk hafoin sarani sira bele hamrik hamutuk hodi hadi’a tiha kapela refere nune’e sarani sira bele senti seguru bainhira partisipa iha missa”Hatutan Reprezentante Sarani Madalena Fernandez da Silva
Observasaun Jornalista Lafaek news iha terrenu nota kapela refere ho kondisaun ne’ebé la faboravel tebes tanba anin hahú sobu sai ona kalen, parede komesa nakfera kalen feruzen hotu ona, janela vidru maioria laiha no ai dodok nune’e tempu udan sarani sira labele ona hala’o atividade misa iha loron domingo.
Jornalista : Zita Menezes
Editor : Agapito de Deus
