Lafaek News-(Kovalima)—Professores sira orienta kada estudante lori au-betun hodi didin EBF Holpilat ne’ebé kuaze tinan 10 resin laiha atensaun husi Ministériu Edukasaun.
Eskola Báziku Filiál (EBF), Um Dois Holpilat suku Holpilat postu administrativu Maukatar munisípiu Kovalima kontinua didin ho au-betun.
Eskola Bázika Filiál Holpilat lokaliza iha suku Holpilat postu admnistrativu Maukata, munisípiu Kovalima no eskola ne’e iha professores hamutuk na’in 7 ho estudantes 108 okupa sala 3, iha Suku Holpilat,didin de’it ho au-betun, tanba impaktu husi udan no anin rezulta janela dodok halo vidru monu namtaten.
Koordenadór EBF Um Dois, João Cardoso, husu Ministru Edukasaun labele haree de’it eskola hirak ne’ebé lokaliza iha vila-laran, maibé presiza tun too areas remotas hodi haree diretamente kondisaun eskola hirak ne’ebé dook husi sidade no susar atu hetan atensaun husi governu.
Ha’u hakarak hato’o de’it kona-ba difikuldade ne’ebé durante tinan barak nia laran eskola ida ne’e hasoru liliu janela sira ne’e dodok hotu halo vidru sira monu arbiru, janela sira ne’e at tanba impaktu husi udan bainhiru monu boot no anin akontese” katak Kordenador Eskola Bazika Filial Holpilat, João Batista Cardoso ba jornalista sira iha nia kna’ar fatin EBF Um Dois Holpilat Tersa (26/07).
João dehan, haree ba kondisaun infraestrutura eskola ne’ebé at nune’e professores sira deside hamutuk orienta kada estudante lori au husi uma didin ba janela eskola hodi satan udan ho anin, tanba vidru a monu hotu ona.
Hafoin vidru sira ne’e na’in monu hotu, ha’u halo enkontru ida ho mestri sira inklui estudante fo orientasaun ba malu atu mai husi uma lori au ho pregu para lori didin janela sira ne’ebé anin sobu ona hahu kedas iha tinan 2010 to’o ohin loron seidauk heta atensaun husi edukasaun” nia informa.
Maske nune’e Kordenador ne’e haktuir kadeira no meja ba alunus sira hodi hala’o prosesu aprendizajem inklui sala aula sufsiente hela, maibé edefisiu eskola mak laiha seguru tanba janela didin de’it ho au-betun, no problema eskola ne’e hato’o beibeik ba iha parte edukasaun, maibé too ohin loron seidauk iha resposta ruma husi ministériu kompetente.
Kuandu udan been tama maka’as liu obrigatoriu prosesu aprendizajem labele la’o tanba tauk vidru monu tan labarik sira atu fo sala ba manorin na’in sira ka fo sala ba se tanba ema nia oan sira mai aprende fila ho kondisaun di’ak la’os fila ba uma ho kanek.” Tenik Nia.
Koordenador Eskola João Batista Cardoso husu ba Ministériu Edukasaun atu toma atensaun ba EBF Um Dois Holpilat, tanba iha eskola refere laiha moru, meja ho kadeira ba profesor sira laiha atu fasilita hanorin estudante sira iha eskola kada aula, laiha mos biblioteka atu hodi asegura livru matadalan.
Reportajen : Chamot Nahac
Editor : Agapito de Deus
