Hosi: Moisés Vicente

Perguntas iha leten Ukun Na’in sira iha Estado Repúblika Demokrátika Timor-Leste atu halo reflesaun no atu rona no tau matan ba halerik sira husi membru Polísia Nasional Timor-Leste (PNTL) nian. Artigo ida ne’e mos analiza kona-bá difikuldade husi Polísia Nasional Timor-Leste (PNTL) no menus iha fasilidade sira transporte kareta no motor, HT hodi halo komunikasaun hodi hala’o servisu iha tereñu lor-loron nian. Exemplo foin dadaun kareta balu atu ba kampaña eleitoral segunda volta nian ba kandidatu Prezidente Repúblika, 1. Dr. José Manuel Ramos Horta no 2. Dr. Francisco Guterres “Lú-Olo”, balu at tiha.

Iha kampañia eleitoral atividade sira ne’e liu hotu ona, no hetan ona tomada posse Prezidente Repúblika eleitu foun maka, Dr. José Manuel Ramos Horta, iha loron, 19 Maiu 2022 kalan. Hare husi ne’ebá membru PNTL sira halo buat hotu la’o diak, tamba hetan seguransa makas husi ita nia forsa seguransa PNTL no F-FDTL rasik. Ida ne’e husu ba ema hotu fó apresiasaun ita nia membru PNTL no F-FDTL ne’ebe durante ne’e seguransa diak tebes ba Ita nia rai doben Timor-Leste. 

Iha Konstituisaun Republika Demokratika Timor-Leste hatur ona klaru, iha ne’ebé Artigu 147 hateten (Polísia no forsa seguransa sira), 1. Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku. 2. Prevensaun kriminál tenke hala’o ho respeitu ba direitus umanus. 3. Lei maka sei harii rejime ba polísia no mós forsa seguransa seluk.

Tinan 20 dezde restorasaun independénsia, ita konsege atinje buat barak, hanesan haforsa paz no dame, no mantein neutralidade no soberania no hadiak infraestrutura bázika. Maske nune’e, violénsia estrutural, liu-liu pobreza, korupsaun no impunidade, kontinua amesa ita nia povu nia moris no ben-estar, no limita Timor-Leste nia transformasaun ba iha nasaun ida ne’ebé prósperu no seguru. Impase polítiku no krize internasionál hafraku liu tan ita nia situasaun internal. 

Povu barak sei moris iha uma ho kualidade menus, falta saneamentu, rendimentu no asesu ba edukasaun no saúde ne’ebé adekuadu. Tanba ne’e, Timor oan barak enfrenta obstaklu barak hodi atinje moris ne’ebé komfortável no seguru. Atu bele rezolve problema kompleksu hirak ne’e, ita presiza kria planu ne’ebé kompreensivu no integradu ba transformasaun estrutural ekonomia, inklui planu atu dezenvolve setór agrikultura no setór indústria no servisus sira seluk. Planu ne’e tenke envolve diskusaun klean ho reprezentativa traballadór no indústria, no mos peritu tékniku sira no asesór internasionál. (Fontes: Relatóriu Fundasaun Mahein (FM), MNL, Nú.157, Loron, 27 Maiu 2022).

Iha loron hirak liu bá, fó sai iha media nasional sira katak Polísia Nasional Timor-Leste (PNTL) deside aluga tan kareta hamutuk tolu nulu resin rua (32) ho montante orsamentu $230.400 atu bele reforsa servisu operasaun durante kampaña no ba eleisaun prezidensial segunda volta. Komandante Administrasaun PNTL, Superintendente Xefe, José Soares hateten kareta tolu nulu resin rua (32) ne’e dadauk sira distribui ona 14 servisu operasaun iha munisipiu 12 no apoiu 13 ba iha Unidade Espesial Polisia (UEP), no 1 Unidade Patrulhamentu Fronteira (UPF), no 2 ba Unidade Polisia Maritima (UPM), inklui 2 ba Servisu Informasaun Polísia (SIP) stand by 1. 

Ohin loron ita halo redistribuisaun ba iha munisipiu sira, ohin kareta 32, ne’e kareta alugadu, orsamentu ne’ebé maka koloka ne’e koloka iha Polísia Nasional Timor-Leste, ho nia montante $230.400,” hatete José ba jornalista sira, iha nia knar fatin Komandu Jeral PNTL, Kaikoli Dili, Sesta (01/04/2022). Nia dehan, kona-bá prosesu aluga kareta 32 ne’e parte PNTL entrega ba kompaña sira ne’ebé antes ne’e manan ona prosesu tenderizasaun ida ne’e. Orsamentu ne’ebé Komandu Jeral PNTL aloka ba iha Eleisaun Prezidensial ne’e.

Ne’e kobre ba iha orsamentu ne’ebé maka husi tudu Governo ne’e iha $1.339.000, resin ne’ebé maka bele kobre ba iha suplementu membru PNTL sira ne’ebé maka halo servisu durante kampaña. Nune’e mos iha orsamentu ida ne’e, aloka ona $100,000,00 ba iha kombustivel atu bele apoiu kareta alugadu sira, nune’e mos ho kareta sira ne’ebé maka apoiu husi Partimoniu Estadu husi Ministeriu Finansas. “Depois de kampaña primeiru faze, iha loron rua ba kotuk, ita rekoila fali viatura sira ne’e, para ita hare fali nia kondisaun hodi manutensaun rapida,” hatete nia. (Fontes: Jornal Suara Timor Lorosae, Loron, 04 Abril 2022).

Perguntas maka ne’e, tamba sa maka ho orsamentu bo’ot los, labele halo jestaun diak hodi sosa deit fasilidade sira ne’ebé membru PNTL sira presiza ba lor-loron nian?.

Iha sorin seluk, Governu planeia ona sei koloka membru Unidade Patrullamentu Fronteira (UPF) 1000 resin iha fronteira hodi minimiza movimentu ilegal. “Hau koalia ona ho Primeiru Ministru (PM) hanesan Ministru Interior, Taur Matan Ruak para haree took Postu ne’ebe eziste nia kondisaun ladiak ne’e pelo menus para hare orsamentu halo rehabilitasaun atu nune’e sira labele hela ho kondisaun ida ne’e. 

Tuir fali kona-bá sira nia ekipamentu ho rekrutamentu, portantu parte ida ne’ebé kurisial loos. Iha fronteira hanesan ita hotu hatene numeru membru sira ne’ebé maka ki’ik. Tanba ne’e maka hau ho Komandante Jeral ho Komandante Administrasaun ami halo ona planu rekrutamentu bazeia ba orientasaun verbalmente Ministru Interior haruka ona nia Gabinte maibé seidauk simu nia resposta, mas depois simu nia resposta maka ita foin haree.

Naturalmente sira nia ekipamentu ho sira nia kuantidade ekipamentu, kuantidade membru ne’ebé maka iha ita presiza sa tan ita aumenta 25 postu ne’e ita presiza ema lubuk ida pelo menus tarjetu ne’e mil ital ne’e diak liu tan”, esplika Vise-Ministru Interior, Antonio Armindo, ba jornalista sira, Segunda (06/06/2022, hafoin abertura seminariu ho tema “Prespetiva Seguransa Fronteira iha Futuru”, iha Timor-Plaza, Dili. (Diario Nacional, Loron, 07 Juñu 2022).

Iha parte seluk, iha media Tatoli sita kona-bá enfrenta problema rekursu umanu no fasilidade asegura fronteira terrestre. Polisia Nasional Timor-Leste (PNTL) liu husi Unidade Patrullamentu Fronteira (UPF), enfrenta hela limitasaun ba rekursu umanu, ekipamentu, rede telekomunikasaun, estrada no kondisaun hela fatin, nudar Governu hahu hadia instraestrutura, hadia membru sira nia bens star, hadia ekipamentu hodi bele asgura seguransa iha fronteira. 

Governu estabelese Unidade Patrullamentu Fronteira ho objetivu fó orientasaun relasiona ho prosidente pratika ka funsaun espesializada no seguransa fronteira bainhira hala’o sira nia knaar no fó komprensaun ida kona-bá knaar no funsaun operasional, administrativu membru hotu-hotu iha Polísia Nasional Timor-Leste no iha Unidade Patrullamentu Fronteira. Ho baze legal tuir mandate ba PNTL iha UPF ne’e foti husi IV Governu Konstituisuainal nia Dekretu-Lei Nu.9/2009, loron 18 Fevereiru kona-bá Lei Organika PNTL, Artigu 33. Unidade Patrullamentu Fronteira ho funsaun maka halo patrullamentu no vijilansia iha fronteira territorial sira, no iha koordenasaun no kooperasaun ho parte interesada sira seluk, espesialmente ho FALINTIL-Forsa Defeza Timor-Leste (F-FDTL). Nune’e mos kontrola movimentu ema no sasan sira iha fronteira territorial, ho koodernasaun no kooperasaun ho Servisu Imigrasaun no Autoridade Auduaneiru Alfnadega. (Fontes: Tatoli, Loron, 07 Juñu 2022).

Iha lidun seluk mos, preokupasaun sira mai husi Organizasaun Naun Governamental (ONG) Fundasaun Mahein (FM) preokupa katak Governu harii infraestrutura postu foun ba Unidade Patrullamentu Fronteira (UPF) maibé laiha ekipamentu hodi detekta negosiu ilegál. Jestor Prinsipal Fundasaun Mahein (FM), Abel Amaral hatete polítika Governu harii postu foun hamutuk 25 iha tinan ne’e iha linha fronteira terrestre, maibé laiha ekipamentu propriu ba membru Unidade Patrullamentu Fronteira sira uza hodi detekta atividade negosiu ilegál.

Ita bele harii postu Unidade Patrullamentu Fronteira no rekursu barak ba iha fronteira, maibé ekipamentu sira sei mukit hau hanoin ita labale detekta krime trans nasional sira hanesan droga, tanba ne’e husu ba Governu tenki investe ekipamentu ba ita nia Unidade Patrullamentu Fronteira sira labele ho deit manual maka halo servisu,”. (Fontes: Jornal Suara Timor Lorosae, Loron, 09 Juñu 2022). 

Atu taka, maka rekomendasaun sira tuir mai ne’e, ho difikuldade ka menus fasilidade sira ba membru PNTL ne’e ba futuru ka tinan oin 2023 prepara Orsamentu Jeral Estadu (OJE), nune’e instituisaun Polísia Nasional Timor-Leste prepara mos atu ba sosa ka hola Bisikleta foun hodi halo patrullamentu iha kapital Dili ho duni bisikleta deit no bele mos ba iha Kapital Munisipiu sira iha 14 Munisipiu iha territoriu Timor laran. Husu ba PNTL prepara hari’i tan antena foun ka tore foun ba PNTL hodi nune’e informasaun ruma husi baze bele to’o lalais ba iha Komandu Jeral PNTL ou bele direita ba iha kada Komandu Munisipiu sira, hol mos HT komunikasaun foun.

Husu Governu kontinua hadia estrada sira hodi hafasil halo patrullamentu husi PNTL-UPF sira bele hafasil sira halo kontrolamentu iha fronteira terrestre sira. Hadia mos ró patrullamentu sira ba Unidade Polísia Maritima (UPM) nia ró ne’ebe at, tenke halo manutensaun ró at refere, hodi nune’e hafasil UPM bele halo patrullamentu ba fronteira maritima ka iha tasi laran. Husu ba VIII Governo Konstitusional atual Primeiru Ministru, Taur Matan Ruak nomos Ministru Interior no Ministro da Defesa, Filomeno da Paixão de Jesus atu hola ona mos avião aero hodi halo patrulamentu ba forsa armada F-FDTL nia hodi kontrola fronteira lalehan nian (Militer Angkatan Udara) nian ba iha futuru. 

*Hakerek Na’in: Alumni Universidade da Paz-(UNPAZ), Faculdade de Direito no Institutu Superior Cristal-Departemento Sociologia no Ativista. Artigo ida ne’e larepresenta institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoál. Iha sujestaun ruma bele haruka iha telefone +67077291406 ou e-mail: moisesvicente59@yahoo.com