Lafaek News–Bendito Carvalho husi Munisipiu Bobonaro kaben hela iha kapital Dili, Aldeia Anin Fuik, Suku Madohi, Postu-Administrativu Dom Aleixo, Munisipiu Dili, buka servisu la hetan pasiénsia deside hili kalen ho besi feruzen at hirak ne’ebé soe lemo-lemo iha sidade laran hodi tetu hetan osan sustenta nesesidade uma laran.
Ami mai hela iha Dili ne’e atu buka servisu hodi sustenta ami nia moris uma laran ho oan sira nia eskola,maibé servisu laiha, Buruh kasar mos laiha, Xina mak servisu domina tiha, entaun ha’u hili dalan, ho ha’u-nia karosa hili kalen ho besi aat hodi tetu sustenta ami nia familia nia moris loro-loron. Bendito de Carvalho dehan ba lafaek news hafoin hili hela kalen at besik supermerkadu Gracia Shop nia sorin, kinta (02/06/2022).
Bendito hamutuk ho nia kaben iha oan na’in 6, oan mane boot moe la eskola, tanba idade joven ona, na’in tolu eskola iha pre-primria 5 de Maio Komoro, oan rua seluk sei ki’ik, família ne’ebé Bendito lidera moris depende ba besi ho kalen a’at, tanba moris iha sidade Dili hanesan bainaka ba rain rasik, maibé tenke esforsu an, tanba laiha uma kain seluk mak sustenta fali uma kain seluk nia nesesidade moris, tenke ho esforsu an rasik la’o buka kalen ho besi aat s hodi sustenta moris familia nian.
Dader tuku 7 Bendito komesa dudu ona karosa la’o haleu sidade Dili, tama sai bairu buka kalen at hanesan osan mean, maske loron manas, buka kalen at hanesan lata mamuk, kalen at no besi feruzen ne’ebé naklekar iha lixu fatin kee sai tula ba karosa, too tuku 12 (meiudia) deskansa han netik etu maran bikan ida hodi kontinua buka fali kalen at too tuku 5 lokraik hafoin para no hodi kontinua ba loron tuir mai.
Moris iha Dili ita la servisu, ita han saida no oan sira ba eskola foti osan husi ne’ebé. Iha Dili ne’e xina mak domina,ita atu faan modo mos ema barak mak faan modo,ita faan hotu modo semak atu hola se nian, Ha’u hanesan aman loron manas mos, pasiensia nafatin hodi buka kalen ho besi aat oan sira rai hamutuk hodi tetu,hela iha Dili servisu mak ne’e ona, Lahalo servisu sira hanesan nee, loro-loron saida, ita tur de’it ita la hetan osan,’’ nia dehan.
Besi ho kalen aat sira ne’ebé nia hetan tetu fali kilu ida hetan sentavus 0,5 sura hamutuk karosa isin ida hetan dolar tolu kada loron, karosa isin rua hetan dolar neen, maibé dala ruma la to’o, tanba kalen ho besi aat sira depende ba lixu ne’ebé soe kada loron, maibé presiza hili too loron tolu ka hat foin bele barak, bainhira barak ona kontaktu ema ba tetu iha nia uma ka dala ruma tenke dudu too fatin tetu besi ho kalen at iha Palapasu nian, sorte di’ak hetan too dolar 12 too 15.
Ha’u hili kalen ho besi aat sira ne’e, loro-loron, ha’u hili barak, too karosa isin 4 ka 5 too 6 hanesan ne’e mak telfone ema la’e dudu lori ba fatin tetu kalen nian. Ha’u lori ba tetu dala-ida hetan 12.00 to’o 15.00,osan sira ne’e ami uza hodi sosa hahan fo ba ha’u nia oan sira ba eskola loro-loron,’’ Bendito hakotu.
Estajiadu : Filipe Soares
Editor : Agapito de Deus
