Lafaek news–Espoza eis Prezidente Repúblika Francisco Guterres Lú Olo, Cidalia Nobre Mouzinho Guterres, husu inan-aman sira atu proteze labarik sira husi situasaun seguru fo liberdidade ba labarik sira atu estuda no halimar iha ambiente saudavel.
Espoza eis prezidente repúblika Cidalia Nobre Mouzinho Guterres hatoo asuntu ne’e relasiona selebrasaun loron ba labarik kiik oan sira iha Sentru Miguel Magone Balide, kuarta (01/06/2022), hodi husu inan-aman sira proteze labarik kiik oan sira iha ambiente hakmatek.
Ha’u husu imi atu hela iha uma mahon ne’e hanesan imi nia uma rasik, no hau sei esforsu ko’alia ho PLAN internasional atu haree kestoens direitu labarik sira nian no hau esperansa lei labarik nian tama ona iha debate espesialidade, hein katak bele aprova hodi bele aselera kazu hirak ne’ebé labarik sira enfrenta lais liu, tanba ha’u hatene labrik balun iha uma mahon ne’e kleur ona, ne’ebé prosesu kleur teb-tebes,’’katak espoza eis Prezidente Repúblika Francisco Guterres Lú Olo iha Sentru Miguel Magone Balide Dili.
Cidalia Nobre dehan, bainhira nia sama ain iha uma Mahon Sentru Miguel Magone Balide, hanoin akumula de’it labarik kiik oan sira, maibé sentru Miguel Magone akumula mos inan sira ne’ebé iha problema iha familia iha uma mahon ne’e.
Fofoun ha’u tama iha ne’e, bainhira hanesan espoza prezidente republika, hau hanoin labarik kiik de’it mak iha ne’e, maibe iha mos inan sira ne’ebé iha problema ho nia familia tanis hasoru hau, hau sente matan-wen sulin, maske hau nia loron ba espoza nian remata ona, maibe ohin hau mai atu hamutuk fo mensajen hanesan inan ida ba labarik sira,”katak Cidialia.
Iha sorin seluk Cipriano Oliveira nu’udar fundador Fundasaun Forum Comunikasaun Juventude Oratoriu Dom Bosco (FFCJ) liu husi Sentru Miguel Magone Balide selebra loron kiik sira atu hatene sira nia direitu lejislasaun atu bele hetan justisa ne’ebe lolos ba sira nia futuru.
Fundasaun ida ne’e mos akumula ona labarik barak liu-liu artisita balun famozu sira hanesan Marvi, Lola Cancio, Dora, Tiago , no seluk tan, sira sai husi fatin ne’e ohin loron sira nia naran famozu iha publiku,’’katak fundador FFCJ, Cipriano Oliveira.
Fundador FFCJ ne’e husu inan-aman sira atu proteze labarik sira husi situasaun la hakmatek no husu labarik sira iha Uma Mahon atu iha nafatin esperansa hodi ezije justisa ho lia loos.
Sira iha uma mahon atu bele enkoraza no motiva labarik sira nafatin ezije justisa no lia loos ba sira nia futuru,’’ Fundador FFCJ ne’e hakotu.
Jornalista : Acacio Pinto
Editor : Agapito de Deus
