Lafaek News–Prezidente Partidu Frente Mudansa (FM), Egídio de Jesus, alias Lamanas Lamalirin rejeita total alegasaun falsu husi estrutura Prezidente ilegál partidu Frente Mudansa, Cesar Vital Moreira no Sekretaria Jerál ilegál Ricardo Cardozo Nheu ho estrutura liuhusi konferénsia imprensa realiza iha loron Kinta (14/04) liubá.
Egídio argumenta, iha konferénsia imprensa liubá sira deklara katak Prezidente Interinu halakon osan USD 52.600, maibé aktu ida ne’e bosok-teen no dun matak mo-moos loos, tanba bazeia ba faktu fundamental iha edisaun jornál repúblika 05-04-2022 afirmadu ofisial no publikamente katak porsentu 100 relatóriu annual ba subvensaun partidu USD 52.600 gasta de’it USD 38.550 ho saldu depositadu ate data $14.240 iha Banku BNCTL ne’ebé ninia kontabilidade valoriza husi ekipa auditoria nasionál CNE ho kategoria diak tebes ho valor 96 tuir regra kontabilidade ne’ebé regulariza no bem organizadu tuir lei númeru 6/2008 16 Abríl 2008.
Ha’u nudar Prezidente Interinu Frente Mudansa legal no estatutual, ha’u rejeita total sira-nia akuzasaun falsa, dun matak, bosok teen ka difamasaun”. Egídio deklara asuntu nee ba jornalista sira liuhusi konferénsia imprensa iha nia hela fatin Likintai, Sábadu (23/04).
Egídio hatete, Ricardo Cardozo Nheu ema ida neebé enjeñeiru arkitetura, maibé sangat di sayingkan tanba laiha kapasidade atu halo leitura no domina didiak estatutu partidu nian husi artigu 1 to 87 neebé nia rasik ho Prezidente eleitu rezignadu Luis Guterres mak asina iha loron 6 fulan Marsu 2017.
Ha’u seen porsentu legal, tanba iha artigu 22-23 estatutu partidu nian, mandatu ba órgaun eleitu nee ba tinan lima, no iha artigu 12 hatete katak eskalaun inferior tenke hakruuk ba eskalaun superior. Hau eleitu iha dia 8 Dezembru 2016 no sai mós Vise Prezidente no Prezidente Interinu inklui portavós iha Frente Dezenvolvimentu Demokrátiku (FDD)”, Egídio afirma.
Egídio dehan, nia parte hatama ona keixa hasoru Ricardo Cardozo Nheu ho estrutura, tanba foti osan partidu nian laiha koñesimentu husi Prezidente Partidu rasik.
Ha’u nia konfiansa perde seen porsentu ba sira, tanba sira ba foti ilegál osan 71 mill, sein fó koñesimentu hau nian, alende nee sira uza tan osan 39, 502.91 ho 100,575.55 sein koñesimentu husi Prezidente partidu Frente Mudansa. Abuzu konfiansa agravadu primeiru ho abuzu gravadu konfiansa daruak bele sai ona burla agravadu”. Egídio relata.
Entretantu antes nee, Estrutura Partidu Frente-Mudansa Lamenta ho Prezidente Sestante, Egídio de Jesus ne’ebé lori naran Partidu nian hodi Partisipa iha kampaíña kandidatu Prezidente Repúblika Lu Olo nian durante segunda ronde.
Frente-Mudansa mós hakfodak bainhira haree pesoál ida neebé konsidera ninia an nuudar Prezidente Interinu, lori naran Frente-Mudansa nian ba apoiu fali kandidatu Lu Olo Pesoál ne’e nia naran Sr. Egídio de Jesus, Nune’e, liuhusi press conference ida ne’e, Partidu FRENTI MUDANSA hakarak informa ba públiku tomak katak,” Hateten Portavós Partidu Frente Mudansa, Daniel Pereira, liu husi konferénsia imprensa iha sede Partidu Villa Verde, Kinta (14/04).
Nia hatutan, Frente-Mudansa suspende tiha ona kargu Prezidente Interinu husi Egídio de Jesus, liuhusi enkontru national iha dia 18 to’o 19 de Dezembru de 2021, ho razaun tanba Egídio de Jesus komete kazu osan partidu nian.
Tuir nia katak, Egídio mós loke konta bankária ilegál, no Tribunal Distritál Dili blokeiu tiha konta bankária neebé nia loke iha Banku Nasionál Komérsiu Timor Leste (BNCTL). Tanba nee Prezidente Sestante nee halakon osan hamutuk rihun limanulu-resin USD.
Aleinde komete iha aktu krime, Egídio de Jesus, halo ona aktu hirak neebé kontra Estatutu Partidu Frente-Mudansa nian Estabelese aliansa ho partidu ki’ik tolu neebé hanaran FDDP, sein fó koñesimentu ba Estrutura tomak Partidu Frente Mudansa nian Hatoo deklarasaun polítika lori Partidu nia naran ba apoiu kandidatu seluk neebé laós bazeia ba Desizaun Partidu nian,” lamenta nia.
Partidu Frente-Mudansa neebé ninia orijen mai husi Grupu Fretilín Mudansa hakfodak bainhira Sekretáriu Jerál Partidu Fretilín, Mari Alkatiri simu Egídio de Jesus hodi involve iha kampaíña ba Kandidatu Prezidente Repúblika Lu Olo nian.
Tuir nia katak, ho Prezensa Egídio de Jesus nian, bele hamihis no hatún kreadibilidade Partidu Fretilín no Kandidatu PR Lu Olo nian neebé hakarak kombate korrupsaun iha sosiedade nia leet.
Bazeia ba aktu hirak neebé temi iha leten, Frente-Mudansa hakarak deklara ba públiku katak, Frente Mudansa liu husi enkontru nasionál ou konferénsia ka kongresu, sei ezenora Egídio de Jesus husi Partidu Frente-Mudansa.
Deklarasaun ida ne’e ami hato’o nu’udar counter polítika partidu nian hodi hasoru “Deklarasaun Polítika ne’ebé hatoo husi Sr. Egídio de Jesus. Frente-Mudansa konsidera ninia deklarasaun ne’e Non Sense no Baseless alias Mamuk. Tanba laiha militante ka estrutura Partidu FM neebé apoiu no lao hamutuk ho nia,” hateten nia.
Povu Timor-Leste tomak hatene ona katak iha dia 19 de Abríl ida-idak sei ezerse ninia direitu hodi fó votu ba kandidatu neebé elejivel atu sai Prezidente Repúblika, povu Timor-Leste mós hatene katak, Partidu Frente-Mudansa ninia pozisaun klaru fó apoiu total ba kandidatu Jose Ramos Horta atu sai Prezidente Repúblika ba períodu 2022 to’o 2027.
Estrutura Nasionál ho Koordenadór Munisípiu FM nian husi Munisípiu 12 inklui RAEOA, ofisialmente hatoo ona deklarasaun partidu ba kandidatu PR, Jose Ramos Horta iha Dili, iha loron 25 Fevereiru No Kontinua fó sai ba públiku iha Munisípiu Ermera, iha dia 26 de Fevereiru 2022.
Frente-Mudansa partisipa ativu tebes, dezde Primeiru Ronde iha atividade kampaíña diálogu no door to door hodi kontribui ona ba vitória Jose Ramos Horta nian, komesa husi nivel nasionál, Munisípiu, Suku no to’o aldeia. Frente-Mudansa kontinua ativu nafatin iha Segundu Ronde hodi fó vitória ba Jose Ramos Horta sai Prezidente Repúblika.
Portavós ne’e husu ba Simpatizante, Militante no kuadru tomak atu kontinua komunga nafatin Doutrina Partidu nian, Luta ba Lia Los, Kamaradajen, Kontinua Aprende no Luta ba Moris Diak.
Nunee husu ba militante prepara-an hakat ba Sentru Votasaun iha dia 19 de Abríl de 2022, vota ba Kandidatu Númeru 1, kandidatu Jose Ramos Horta ba Prezidente Repúblika, períodu 2022 too 2027, entretantu, Prezidente Partidu Frente Mudansa assume husi, Cesár Vital Moreira no Sekretáriu Jerál assume husi Ricardo Cardoso Nheu.
Jornalista : Agapito de Deus
Editor : Florianoa Soares
