Lafaek News–Kandidatu númeru 2, atual Prezidente Repúblika Francisco Guterres Lú Olo, hateten respeita vontade povu nian ne’ebé espresa liu husi buletim votu no simu rezultadu eleisaun husi povu ho laran ksolok, maibé misaun polítika seidauk remata.
Povu doben Timor rezultadu eleisaun prezidensiál segunda volta, hatudu ona José Ramos-Horta mak sei sai Prezidente Repúblika 2022-2027, ne’e mak vontade povu nian, espresa liu husi buletím votu, ha’u simu votu rezultadu eleisaun ho laran hakmatek no ksolok tanba povu rasik mak hili nia prezidente repúblika, parabéns ba Horta nu’udar prezidente eleitu, ha’u fiar katak sei kopera ho instituisaun estadu sira,’’ Espressa atuál Prezidente RDTL, Francisco Guterres Lú Olo, ba Jornalista sira iha sede nasionál Kandidatura númeru 2 Luz Clarita, Akait (22/04/2022).
Kandidatu númeru sorteiu 2 ne’e hatoo mos nia parabéns ba povu Timor Leste tomak ne’ebé hatudu nia maturidade polítika liu husi dalan hametin páz no la’o ho trankuilidade iha tempu kampaña too eleisaun remata.
Kona-bá vida polítika hafoin ses husi kargu Prezidente Repúblika, Lú Olo hatan, Nia Vida polítika seidauk remata, hodi prepara FRETILIN ba eleisaun parlamentár.
Nu’udár sidadaun ha’u nia vida polítika seidauk hotu, singnifika ha’u sei hateke ba do’ok,’’ Lú Olo argumenta.
Ikus liu Lú Olo hatooo nia agradese ba partidu polítiku kompostu husi FRETILIN, PLP KHUNTP ho Os Verdes de Timor inklui organizasaun polítika sira hotu ne’ebé apoiu ona nia kandidatura iha eleisaun primeira no segunda volta no apresiasaun boot ba órgaun eleitorál, seguransa no defeza no-mos observadór, fiskais sira hotu ne’ebé organiza no assegura ho di’ák eleisaun prezidensiál 2022 to’o remata.
Entretantu, tuir rezultadu apuramentu final husi STAE, kandidatu prezidente ho númeru sorteiu 1, José Ramos-Horta, konfirma ho votu maioria, totál 397.145 (62.9%) hafoin kandidatu Francisco Guteres Lú Olo tuir ho Votus 242.440 (37.91%).
Jornalista : Rita Moniz
Editor : Agapito de Deus
