Lafaek News–Prezidente Repúblika Francisco Guterres Lú Olo, promulga lei kona-ba atribuisaun subsídiu ba operadores rodaviáriu públiku, aéros, marítimu nasionais no adquirentes kombustivel ba atividade agríkola no peskas.
Atúal Presidente Repúblika Fransisco Guterres Lú Olo deklara liu husi komunikadu imprensa ne’ebé jornalsita asesu iha Média Palásiu Prezidensiál tersa (19/04/2022) iha palasiu prezidente repúblika Aitarak-laran Dili Timor Leste.
PR Lú Olo ohin, promulga Dekretu-Lei kona-ba atribuisaun subsídiu ba operadores transportes rodaviariu públiku, aéros, marítimu nasionais no adkirentes kombustivel ba atividade agrikola no peskas,’’ afirma Lú Olo.
Tuir Xefi Estadu katak, dekretu ne’e estabelese subsídiu finanseiru, ho natureza esesional no tranzitória ho objetivu hamenus impaktu ekonómiku husi folin kombustivel ne’ebé sa’e, atribui ba operadores transportes públikus no ba adquirentes kombustíveis destinadu ba atividades agríkola no piskatória.
Tuir nia, iha loron 13 abril 2022, Konsellu Ministrus aprova dekretu-Lei ne’e hodi hatan ba folin kombustiivel ne’ebé sa’e tanba efeitu husi funu iha Ukrania, Dekretu-Lei ne’e hatete situasaun akontese iha Ukrania provoka aumentu substansial folin baril petroleum, folin kombustível sa’e makaas ba konsumidores prejudika dezenvolvimentu atividade ekonómika País nian.
Subsídiu sei atribui liuhusi voucher kombustível, ho montante korrespondente ho 100% husi valor diferensa entre folin médiu husi kombustível iha dezembru 2021 no folin kombustivel ne’ebé aplika iha data emisaun voucher kombustível, ho voucher kombustivel ne’e se litru ida sa’e husi $1 ba $1,25, governu sei fó subsídiu sentavus 25″, esplika PR Lú Olo.
Jornalsita : Rita Moniz
Editór : Agapito de Deus
