Lafaek News–Kandidatu Prezidente Repúblika númeru sorteiu 1, Premiadu Nobel Ba Paz, José Ramos Horta hateten komprimisu polítika kona-ba dizolve parlamentu nasionál la’os prioridade bainhira eleitu ba prezidente repúblika.
Atu dizolve parlamentu ka la dizolve la’os tanba Nobel da Paz, tanba eleitu ba prezidente iha responsabilidade, ne’e la’os hanesan prioridade ida ba ha’u,’’ katak Premiadu Nobel da Paz, José Ramos Horta ba jornalista sira hafoin vota iha sentru votasaun Metiaut, tersa (19/04/2022).https://lafaeknews.tl/horta-prontu-simu-lakon-ho-manan-sei-servisu-hamutuk-ho-fretilin/
Horta afirma, bainhira eleitu duni ba prezidente repúblika prioridade ne’ebé nia sei halo mak restaura orden konstitusional, respeita estadu direitu demokrátika ho konstituisaun.
Prosesu ida ne’e la signifika tenke liu husi dizolusaun parlamentu nasionál, liu husi diálogu ho bankada sira, tanba ohin povu ba vota se hili karik ha’u signifika rezolve tiha problema boot ne’ebé prezidente Lú Olo mak halo ho violasaun konstituisaun,’’ Horta argumenta.
Nia akresenta, iha mós problema seluk iha parlamentu ho governu, maibé presiza liu husi dalan diálogu ho bankadas sira hotu, primeiro ministru Taur Matan Ruak ho nia membru governu hotu para haree saida mak di’ak liu ba rai doben Timor Leste.
Iha sorin seluk, Horta fundamenta durante tinan 20 liu ba nia parte sempre tulun joven sira dala ruma apoiu pesoal, ajuda estudante, kosok-oan sira, no halo kontaktu ho ema parseiru lubuk ida iha liur ho embaixada sira hodi apoiu Timor-oan sira.
Uluk ha’u hanesan ministru negósiu estranjeiru ha’u mak loke diálogu Korea do Sul ho Austrália para haruka ita nia joven sira ba servisu iha liur, ba oin ha’u sei haree ho parlamentu governu atu iha programa espesiais ba kosok-oan sira inklui ba joven sira, primeiru nutrisaun, haree oportunidade ba formasaun téknika no formasaun siéntifika no haree mos ita nia adezaun ba Asian,’’ nia afirma.
Horta hatete, hahú ohin ba oin presiza preparasaun ida kle’an ba adezaun Asean hodi loke kampu servisu ba joven barak,’’ tenik nia.
Kon-ba karta ne’ebé dirije husi sekretariu jeral partidu FRETILIN Mari Alkatiri ba lider nasionál sira atu diálogu, maibé Horta afirma karta refere nia parte seidauk lé no sei rai hela iha nia eskritóriu.
Tanba preukupasaun ho eleisaun segunda ronde ne’e ha’u seidauk lé, más ha’u sempre prontu diálogu, karta ne’e dirije ida ba ha’u no dirije ida ba maun boot Xanana, ha’u nia pozisaun mak ne’e enkuantu eleitu ba prezidente aliende ko’alia ho partidu sira hotu, ha’u tun keda ba ko’alia ho FRETILIN ho partidu sira seluk ho personalidade sira seluk ne’ebé apoiu ha’u importante,’’ horta hakotu.
Jornalista : Agapito de Deus
Editor : Floriano Soares
